1 Wabweda iwanu iwokala aku wahela matotso,
awala iwokinda ghamalaghitso gha IMNDEWA.
2 Wabweda ghendo awala wose iwokinda imiko yake,
awala wose iwombama kwa mimoyo yawo yose,
3 awala ing'awotenda ghendo ighehile,
wawo wakwanga ghendo mna tsinzila tsa IMNDEWA.
4 Ghweghwe kutughalila ghamalaghitso ghako,
na tuye tobamighwa tughakinde kwa ukwalangitsa.
5 Nzila tsangu tsing'awile tsinogha,
nighakinde ghamalaghitso ghako.
6 Ning'aghalangula ghamalaghitso ghako,
sitsakuwa na chinyala baye.
7 Nitsokutunya kwa ghumoyo ghunoghile,
ahala hanifunda nimwenyegho ghamalaghitso ghako ghana ihaki.
8 Nene nitsokinda ghamalaghitso ghako,
uleke kundeka ghendo.
9 Angu imsongolo yodahatse kutsika tsinzila tsake tsele?
Ng'ambe kwa ukukinda ghamalaghitso ghako.
10 Nokubama kwa ghumoyo ghwangu ghwose,
uleke kundeka nyange kutali nighaleke ghamalaghitso ghako.
11 Nigheka ghamalaghitso ghako mmoyo mwangu,
hela ndeke kukutendela inzambi.
12 Ubalikiighwe ghwe IMNDEWA,
unifunde ghamalaghitso ghako.
13 Kwa milomo yangu nitsakuyila kulonga kwa ukukemelela,
ighalawile mna ghumlomo ghwako.
14 Nene nitsodeng'elela ukuwinza ghamalaghitso ghako,
ka apfila imunu iyodeng'elela hayakuwa na tsimali nyingi.
15 Notongelela ghamalaghitso ghako,
na notsalangitsa tsinzila tsako.
16 Noideng'elela imiko yako,
sighasemwa baye ghamalonga ghako.
17 Unitendele ghanoghile nene imtumighwa wako,
niwe mgima na nighakinde ghamalonga ghako.
18 Utsifumbule tsinenge tsangu,
mbone pfinu pfa ukukangawatsa ipfili mna ghamalaghitso ghako.
19 Nene na mgheni mna isi aino,
uleke kughapfisa ghamalaghitso ghako.
20 Ghumoyo ghwangu ghotama kwa ukulolela,
ghobama ghumanye ghamalaghitso ghako matsuwa ghose.
21 Ghweghwe kowamanila wose wana ichidandali, awala iwalighitighwe,
na awala ing'awokinda ghamalaghitso ghako.
22 ghamaligho ghao na ukubetsa kwawo kukale kutali na nene,
kwaapfila noghakinda ghamalaghitso ghako.
23 Hata ka iwakulu wetingana hamwe na wonyikila tsengwe,
nene mtumighwa wako noghatongelela ghamalaghitso ghako.
24 Ghamalaghitso ghako ghonitenda nene nideng'elele.
nagho ghonilongotsa cha ukutenda.
25 Nebulughitsa hasi mtimbwisi,
ungaye keli ugima wangu ka apfila pfaulongile.
26 Tsanikulongela nzila tsangu pfatsili, naghwe tsakunyinidika,
lelo nifunde ghamalaghitso ghako.
27 Unifunde apfila ghamalaghitso ghako pfaghali,
na nene nitongelele ng'onde tsako tsa ukukangawatsa.
28 Ghumoyo ghwangu ghwipfa ukwona usungu,
unyongetse tsingupfu ka apfila pfaulongile.
29 Nyike kutali na nzila tsa ughutsu,
unifunde ghamalaghtso ghako kwa uluso.
30 Nene nisaghula inzila ilongesa,
nighwika ghumoyo ghwangu mna ghamalaghitso ghako.
31 Ghwe IMNDEWA, nene nighananahila ghamalaghitso ghako,
uleke kundeka niumbuke.
32 Noitsumila inzila yako ina ghamalaghitso,
kwaapfila ghweghwe kunyongetsa tsimbutsi tsa ukumanya.
33 Ghwe IMNDEWA nifunde ghamalaghitso ghako.
na nene nitsoghakinda mbaka ghamatsuwa haghatsomala.
34 Unyapfile nimanye ghamalaghitso ghako,
na nighakinde kwa ghumoyo ghwangu ghose.
35 Unilongotse mna inzila ya ghamalaghitso ghako,
kwaapfila amwo nene nodeng'elelela.
36 Ughutende ghumoyo ghwangu ghukinde ghamalamtsi ghako,
ndeke ukusulukila kuwa na tsimali.
37 Utsighome tsinenge tsangu tsileke kulola pfinu pfa ubotsi,
unyike nikale mgima mna tsinzila tsako.
38 Unitendele nene mtumighwa wako aghala ghaulongile,
ili ghweghwe upfukighwe.
39 Chike kutali ichinyala chanipfuka,
kwaapfila ghamalaghitso ghako ghanogha.
40 Lola apfila pfanibama ghendo ukughakinda ghamalaghitso ghako,
utende ugima wangu uwe wa sambi kwaapfila ghweghwe kuna ihaki.
41 Ghwe IMNDEWA, uluso wako ing'aumalagha baye unitsile,
unikombole ka apfila pfaulongile.
42 Baho nitsomwidika wowose iyondigha,
kwaapfila nene notoghola ghamalonga ghako.
43 Unende nene nongeghe ukulongesa kuliyeka,
kwapfila nene nyika lolelo lyangu mna ghamalamtsi ghako.
44 Nene nitsoghakinda malaghitso ghako matsuwa ghose,
Ona, nitsokinda ghendo matsuwa ghose ing'aghomala.
45 Nani nitsakwanga ka imunu iyadoholighwe,
kwa apfila nifunditsa ghamalaghitso ghako,
46 na nitsoghalonga malaghitso ghako hambele ha iwafalume,
wala sitsakwona chinyala baye.
47 Nitsodeng'elela ng'ani mna ghamalaghitso ghako,
agho nene noghakunda.
48 Na ghamoko ghangu nitsoghenulila ghamalaghitso ghako,
na nene nitsotongelela malaghitso ghako.
49 Ukumbuke achila chaumlongele imtumighwa wako,
kwaapfila kunitenda nene nihuwile acho chaulongile.
50 Acho chicho ichinikanza mna ghamaghayo ghangu,
kwaapfila acho chaulongile chongaya ugima.
51 Wana ichidandali wanibetsa ng'ani,
lekeni nene sighalekile laghitso ghako.
52 Ning'aghakumbuka ghamalamtsi ghako gha ghumwande,
Ghwe MNDEWA, ghonikanza.
53 Nene noghudubuka ng'ani,
hanikona iwanu iwehile woleka ukukinda malaghitso ghako.
54 Nene nakwimba wila wa malaghitso ghako,
chila hanu hanighenda.
55 Hachilo nilikumbuka litaghwa lyako, Ghwe MNDEWA,
na nighakinda malaghitso ghako.
56 Alino lilyo lyanitendagha, kwaapfila nighakinda ghamalaghitso ghako.
57 IMNDEWA yuyo imali yangu nene,
nani nilonga nitsoghakinda malonga ghako.
58 Niubama uhanga wako kwa ghumoyo ghwangu ghwose,
unitendele uluso ka pfaulongile.
59 Nipfikitsa tsinzila tsangu pfatsili,
na nighalongotsa ghamaghulu ghangu mna ghamalamtsi ghako.
60 Nisumka wala sikawile baye,
ukughakinda ghamalaghitso ghako.
61 Hata ka iwanu iwehile tsawanyoha imitsabi,
lekeni nene sighasemwile baye ghamalaghitso ghako.
62 Chilo ghati ghendo nolamka nikulongele mighede,
kwaapfila malamtsi ghako gha haki.
63 Nene na sale yawo kwa awala wose iwokupfuka ghweghwe,
na awala wose iwokinda imiko yako.
64 Isi imema uluso wako mkulu, Ghwe MNDEWA,
lelo unifunde ghamalaghitso ghako.
65 Kumtendela ighanoghile nene imtumighwa wako,
ka pfaulongile ghwe MNDEWA.
66 Unifunde niwe na tsimbutsi tsa ukulamla ghoya na ukumanya,
kwaapfila nene nehuwila ghamalaghitso ghako.
67 Hanikalile sina nighanzike baye tsaning'ali nitotsa,
lekeni sambi nolikinda lilonga lyako.
68 Ghweghwe kunogha na kotenda ighanoghile,
nifunde ghamalaghitso ghako.
69 Wana ichidandali wanighutsukila hela,
lekeni nene noghakinda ghamalamtsi ghako kwa ghumoyo ghwangu ghwose.
70 Imimoyo yawo ifa taletale
lekeni nene noghadeng'elela malaghitso ghako.
71 Tsa pfinogha apfila nene nighanzike,
ili nifunde malaghitso ghako.
72 Ghamalaghitso ghalawile mna ghumlomo ghwako nene ghanoghela,
kubita maelufu gha inzahabu na ifetsa.
73 Ghamoko ghako ghaniumba na ghanyika apfino pfanili
ungaye tsimbutsi ili nifunde ghamalaghitso ghako.
74 Awala iwokupfuka hawombona wadeng'elele,
kwaapfila nene nihuwila lilonga lyako.
75 Nimanya, Ghwe MNDEWA, kuwa ghamalamtsi ghako gha haki,
na kwa ukutogholeka kwako kunidununza.
76 Lelo nokulomba, uluso wako mkulu unikanze,
ka pfaunongele nene imtumighwa wako.
77 Leka libatsi lyako linitsile, ili niwe mgima,
kwaapfila nene noghadeng'elela maghitso ghako.
78 Leka wana ichidandali wone chinyala,
kwaapfila wanitendela ghehile,
ila nene nitsotongelela ghamalamtsi ghako.
79 Waleke iwokupfuka wambuyile, nawo watsomanya,
hamwe na awala iwoumaya ukalangama wako.
80 Nobama ghumoyo ghwangu ghuleke kutotsa mna ghamalamtsi ghako,
ili nene ndeke kughelighwa chinyala.
81 Nene notsilika kwa kuubama ukombotsi wako,
na nololela mna lilonga lyako.
82 Tsinenge tsangu tsipfonda kwa ukulolela achila chaunongele,
noghutsa "Ukutsa tsuwachi unikanze?"
83 Kwaapfila niwa kama chikoba cha ngotsi ichipfondile ichilebela mchanya mwa liyosi,
lekeni ghamalaghitso ghako sighasemwile baye.
84 Nene imtumighwa wako nitsokubeta mbaka tsuwachii?
Awala iwonidununza utsowahigha tsuwachi?
85 Wana ichidandali wanihimbila ghamapondo,
iwanu awala ing'awowinza malamtsi ghako.
86 Malaghitso ghako ghose ghotogholeka,
utse unyapfile kwaapfila iwanu wonidununza hela.
87 Chidogho ghendo wanikome muisi,
lekeni nene sighalekile baye ghamalamtsi ghako.
88 Kwa uluso wako unyike niwe mgima,
na nene nitsokinda ghamalamtsi ghaulongile kwa ghumlomo ghwako.
89 Ghwe MNDEWA lilonga lyako lyokala matsuwa ghose,
na likighwa ghoya ako kulanga.
90 Ukutogholeka kwako kokala lweleko mbaka lweleko,
ghweghwe kuika isi hanu hake, na baho ima ghoya ghendo.
91 Kwa ghamalamtsi ghako ipfinu apfo pfabaho mbaka leloli,
kwaapfila ipfinu pfose pfokutumikila ghweghwe.
92 Ka nene tsasighadeng'ele baye ghamalaghitso ghako,
nene ning'ahupile ghendo mna ghamaghayo ghangu.
93 Nene sitsoghasemwa ghendo ghamalaghitso ghako matsuwa ghose,
kwaapfila kwa agho kunitenda nikale mgima.
94 Nene na wakwako, unikombole
kwaapfila tsanighakinda ghamalaghitso ghako.
95 Iwanu wehile wobetetsa wanikome,
lekeni nene notongelela ghamalaghitso ghako.
96 Chila chinu ichenele chitsotsigha,
lekeni ghamalaghitso ghako ng'aghatsotsigha baye.
97 Lola, pfanighakunda ghamalaghitso ghako,
nene noghapfikitsa misi ngima.
98 Ghamalaghitso ghako ghonitenda niwe na ihekima kubita maaduwi tsangu,
kwaapfila ninagho matsuwa ghose,
99 Nene nina mbutsi kubita awala iwanifundile,
kwaapfila noghafikitsa ghamalamtsi ghako.
100 Nene nina mbutsi kubita iwanzehe,
kwaapfila niikinda imiko yako.
101 Nighaghoma ghamaghulu ghangu ghaleke kwanga mna tsinzila tsihile
ili nidahe kukinda lilonga lyako.
102 Nene sighalekile baye ghose ghaunifundile,
kwaapfila ghweghwe ghumwenyegho yuyo yunifundile,
103 Ghamalonga ghako ghamta sideke kuna nene,
ghamta kubita uki mna ghumlomo ghwangu.
104 Imiko yako yongaya nene itsimbutsi,
apfo chila nzila ihile nene nohihila.
105 Longa lyako lya tala ilinilongotsa ghamaghulu ghangu,
na lya ghumwanga kuna inzila yangu.
106 Nilaha na nilighitsa ghendo,
ka nitsoghakinda malamtsi ghako ighali gha haki.
107 Nene tsanighaya ng'ani, ghwe IMNDEWA,
umbuyitsile ugima wangu ka lilonga lyako pfalilonga.
108 Ghwe IMNDEWA utoghole apfila pfanikutunya kwa ukubama nimwenyegho,
na unifunde ghamalaghitso ghako.
109 Ugima wangu noukindilitsa mna ghumoko ghwangu,
lekeni sitsoghasemwa baye ghamalaghitso ghako.
110 Iwehile tsawaniteghela nyonzo,
lekeni silekile baye kuikinda imiko yako,
111 Ghamalaghitso ghako ghamali yangu ya ghamatsuwa ghose,
agho ghaghutenda ghumoyo ghwangu ghudeng'elele.
112 Ghumoyo ghwangu ghobama ng'ani,
ukughakinda ghamalaghitso ghako mna ghamatsuwa ghose.
113 Nowehila iwanu wala iwali ndumila kuwili,
lekeni nene noneghelwa na ghamalaghitso ghako.
114 Ghweghwe kwa hanu hanitsumilila na kwa ngawo yangu,
nene nehuwila lilonga lyako.
115 Mke hana nene mwemwe iwehile,
ili nidahe kughakinda ghamalaghitso gha Imulungu wangu.
116 Nigangamitse ka apfila pfaulongile, nene nikale,
uleke kundeka nihumbuke mna lila lyanihuwila.
117 Nikindilise na nene nitsakuwa mgima,
na nene nitsoghendelela kughategheletsa ghamalaghitso ghako
118 Kowalema wose iwokala kutali na ghamalaghitso ghako,
kwaapfila ghehile ghawopfikatsa gha hela.
119 Kowona iwanu wehila ka apfila mibangu,
apfo nene nonoghelwa na ghamalamutsi ghako.
120 Lukuli lwangu lyodedema kwa ukupfuka ghweghwe,
Ghamalamutsi ghako ghonenda ningilwe na wogha.
121 Nitenda ighali ghahaki na ighanoghile,
apfo uleke kuwaleka iwali na ichidandali wanidununze.
122 wike laghano lya ukunitendela nene ighanoghile,
na uleke kuwaleka iwali na ichidandali wanidununze.
123 Nenge tsangu tsipfa kukubeta ghweghwe unikombole,
nokubeta utende achila chaulongile.
124 Unitendele nene imtumighwa wako kwa kulola uluso wako,
na unifunde ghamalaghitso ghako.
125 Nene na mtumighwa wako, apfo ungaye tsimbutsi,
nidahe kughamanya ghamalamtsi ghako.
126 Ghwe IMNDEWA, matsuwa gha ukutenda chinu ghapfika,
kwaapfila iwanu waleka kughakinda ghamalaghitso ghako.
127 Kwaapfila nene noneghelwa na ghamalaghitso ghako,
kubita inzahabu, ona kubita inzahabu iyelile ghendo.
128 kwaapfila noyona imiko yako yose inogha,
na chila nzila ihile nene nohihila.
129 Imiko yako yokangawatsa ghendo,
apfo nitsoikinda kwa ghumoyo ghwangu ghose.
130 Ghamalonga ghako hagholongighwa mwatsi, ghoghala ghumwanga,
na ghoweng'a tsimbusi iwanu ing'awomanya chinu.
131 Nyasama ghumlomo ghwangu aku nina batsu,
kwaapfila nene nighabama ng'ani ghamalaghitso ghako.
132 Uhunduke na umbonele libatsi,
ka apfila pfauwatendela awala iwokunoghela.
133 Utsilongotse ghamaghulu ghangu ka pfaulongile,
uleke kughaleka ghehile ghanongotse.
134 Unikombole ndeke ukudununzighwa na iwanu,
ili nidahe kuikinda imiko yako.
135 Unimwemwesela nene imtumighwa wako ghumwanga ghwa ichihanga chako,
unifunde imiko yako.
136 Nenge tsangu tsolawa masotsi ka chikolongo,
kwaapfila iwanu walema ukughakinda ghamalaghitso ghako.
137 Ghwe IMNDEWA, ghweghwe kotenda ighali ghahaki,
na malamtsi ghako gha ghoya.
138 imiko yautwing'ile inogha,
na yolongesa ghendo.
139 Nene nodeseka sideke
kwaapfila maaduwi tsangu woghabetsa ghaulongile.
140 Ghamalaghano ghako ghose ghotogholeka,
na nene mtumighwa wako nonoghelwa nagho.
141 Nene na mdodo na nobetsighwa,
lekeni nene siisemwa baye imiko yako.
142 Ghweghwe kwa wahaki na kutsotenda ighali ghahaki matsuwa ghose,
na malaghitso ghako gholongesa.
143 Ukughaya na usungu tsapfinitsila,
lekeni ghamalaghitso ghanenda nene nideng'elele.
144 Ghamalamtsi ghako gha haki ghendo,
ungaye tsimbutsi nidahe kukala mgima.
145 Ghwe IMNDEWA, nokulilila kwa ghumoyo ghwangu ghose,
unyidike ghwe IMNDEWA, niwinze ghamalaghitso ghako.
146 Nokukema unikombole,
na nene nitsokinda imiko yako.
147 Nolamka lupfilipfili na nokulilila unyapfile,
nene nehuwila ghamalonga ghako.
148 Nokala meso chilo chigima,
aku noghapfikitsa ghamalaghitso ghako.
149 Kwa uluso wako ghwe IMNDEWA, unihulikitse,
uwike ugima wangu kwa kulola ghamalamtsi ghako.
150 Iwanu iwonitendela litsengwe wahabehi wakutsa,
wawo wakutali ghendo na ghamalaghitso ghako,
151 Ghweghwe IMNDEWA, kwahabehi,
naghamalaghitso ghako gholongesa.
152 Kulawa ghumwande nene nighamanya ghamalamtsi ghako,
naghwe kugheka ghakale matsuwa ghose.
153 Lola ghamaghayo ghangu na unikombole,
kwaapfila sighasemwile baye ghamalaghisto ghako.
154 Unyamile mna lighomba alino na unikombole,
ungaye ugima ka apfila pfaulongile.
155 Iwanu wehile ng'awokombolighwa baye,
kwaapfila ng'awowinza baye ghamalaghitso ghako.
156 Ghwe IMNDEWA, libatsi lyako kulu,
ungaye ugima wangu ka pfaulongile.
157 Maaduwi iwonidununza wa wengi,
lekeni nene sihunduke baye ndeke imiko yako.
158 Haniwona iwanu ing'awokutoghola baye nene nodeseka,
kwaapfila ng'awohulikitsa baye lilonga lyako.
159 Lola apfila pfaniinoghela imiko yako,
umbuyitsile ugima wangu kwaapfila ghweghwe kuna uluso mkulu.
160 Ghose ghaulonga gholengesa,
ghamalaghitso ghako gha ihaki ghokala matsuwa ghose.
161 Iwakulu wanidununza hela,
lekeni ghumoyo ghwangu ghodedemekela lilonga lyako.
162 Nodeng'elela lilaghano lyako,
k apfila imunu pfyayodeng'elela hayoboka pfinu pfinoghile kung'ondo.
163 Nowihila ughutsu nawo wonidesa ghendo,
lekeni nene noghakunda ghamalaghitso ghako.
164 Chila tsuwa nene nokutunya mala saba,
kwaapfila ghamalaghitso ghako ghahaki.
165 Iwoghakunda ghamalaghitso wokala tseghamba ghendo,
kuduhu chinu ichiwatenda wekwale.
166 Ghwe IMNDEWA, nene nobetetsa unikombole,
na ghamalaghitso ghako nene noghakinda.
167 Noikinda imiko yako,
kuya noikunda ng'ani.
168 Noikinda imiko yako na ghamalamtsi ghako,
kwaapfila tsinzila tsangu tsose tsa hambele hako.
169 Ghwe, IMNDEEWA chililo changu chipfike kuna ghweghwe,
ungaye tsimbutsi ka apfila pfaulongile.
170 Chanilomba chipfike kuna ghweghwe,
nikombole ka pfaulongile.
171 Milomo yangu itsokutunya ghweghwe,
kwaapfila konifunda imiko yako.
172 Lulimi lwangu lustolimbila lilonga lyako,
kwaapfila ghamalaghitso ghako ghose ghahaki.
173 Ghumoko ghwako ghukaleghe ghoya ukunyapfila,
kwaapfila nisaghula kughawinza ghamalaghitso ghako.
174 Nokubetetsa ghweghwe unikombole, Ghwe IMNDEWA,
ghamalaghitso ghako ghonenda nene nideng'elele.
175 Undeke nene nikale mgima nikutunyeghe,
na ghamalaghitso ghako ghanyapfile.
176 Nyanga akuno na akuno ka ng'olo yaghile,
utse unibame nene mtumighwa wako,
kwaapfila nene sighasemwile baye ghamalaghitso ghako.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)