1 Nimbeta IMNDEWA kwa ukududumila,

naye kanyinamila na kahulika ichililo changu yanyapfile.

2 Kanidinitsa kulawa kuna lipondo lihile,

kaghemisa ghamaghulu ghangu mchanya mwa libambalawe,

katenda ghamaghulu ghangu ghagangamle.

3 Kuya kanilangulitsa wila wa sambi umlomo mwangu,

wila wa ukumtunya Imulungu wetu,

wengi watsakona na ukupfuka,

nao watsehuwila IMNDEWA.

4 Kabweda imunu ayula iyehuwila IMNDEWA,

iyoleka kwihuwila iwanu wana ichidandali,

na awala iwohunduka na kulonga ughutsu.

5 Ghwe MNDEWA, Imulungu wangu,

kututendela pfinu pfingi pfa ukukangawatsa,

na aghala ghaubama kututendela kuduhu iyodaha kughapeta,

kuduhu munu iyeghala na ghweghwe,

ka ning'abamile kughatangatsa na kughalonga,

ghang'awile mengi sideke ukughapeta.

6 Nzabihu na tsinambiko ng'utsibamile baye,

tsinambiko tsa ukulakatsighwa

na tsinambiko tsa inzambi natso ng'utsibamile baye,

lekeni ghamaghutwi ghangu kughatsibula ghahulike.

7 Baho hanilongile, "Lola! Nitsa,

ka tsimbuli tsangu pfatsandikighwe mna ichitabu cha ghamalaghitso."

8 Ghwe Imulungu wangu, nene nodeng'elela ukutenda chaubama,

na ghamalaghitso ghako gha mghati ghendo mwa ghumoyo ghwangu.

9 Mna ghumtingano mkulu, nene niwalongela iwanu apfila ghweghwe pfauli wa haki,

ka pfaumanya Ghwe MNDEWA,

nene silekile baye ukulonga apfila pfauli.

10 Nene sipfisile baye mna ghumoyo ghwangu kuwalongela apfila ghweghwe pfauli wahaki,

niwalongela apfila ghweghwe pfautogholeka na pfaunikombole,

sipfisile baye kuwalongela iwanu iwali mna ghumtingano mkulu,

apfila ghweghwe pfauli mluso na pfaulongesa.

11 Ghwe MNDEWA, ughendeleleghe ukumbonela libatsi lyako,

kwaapfila uluso wako na ukulongesa kwako kutsonikinga.

12 Kwaapfila ghamaghayo mengi ing'aghopeteka baye ghanitsunguluka,

tsinzambi tsangu tsinitsidi, mbaka sidaha ukwona baye,

tsiwa nyingi ghendo kubita tsimvili tsa litwi lyangu,

na ghumoyo ghwangu ghutsilika mghati mwangu.

13 Ghwe MNDEWA, ung'anoghelwa, utse unikombole,

Ghwe MNDEWA, utse sambi baha unyapfile.

14 Awala wose iwoubama ugima wangu

waghelighwe chinyala na waumbuke,

wose iwobama nene nilaghighwe,

woyitsighwe kuchughu na wone chinyala.

15 Awala iwonyowela, "Alyo! Alyo!"

Waumbuke na wone chinyala

16 Lekeni awala wose iwokubama ghweghwe,

wasekelele na wakudeng'elele,

na waghendelele ukulonga, "IMNDEWA mkulu,"

awala iwonoghelwa na ukombotsi wako.

17 Lekeni nene na mhingwa yanibama nyapfilighwe,

IMNDEWA yanikumbuke,

Ghweghwe yuyo uli wa ukunyapfila na wa ukunikombola,

Ghwe Imulungu wangu, uleke kukawa.