1 Ghwe Imulungu, kwa ghamaghutwi ghetu,

tuhulika aghala sekulu tsetu ghawatusimile,

aghala ghautendile mna ghamatsuwa ghawo,

ghamatsuwa gha ghumwande ghendo.

2 Ghweghwe kwa ghumoko ghwako kuwawinga iwanu wa isi tsingi,

kuweka sekulu tsetu wakale,

ghweghwe kuwadununza iwanu wa tsiisi atso,

lekeni wawo kuwatenda wabwede.

3 Kwaapfila iwanu wako ng'awaisolile isi kwa ghamapanga ghao baye,

wala ng'awahumile kwa tsingupfu tsa ghamoko ghawo baye,

lekeni tsawahuma kwa ghumoko ghwako ghwa kujilo,

ona, kwa ghumoko ghwako,

na kwa ukuwamwesesela ichihanga chako, kwaapfila tsakuwakunda,

4 Ghweghwe kwa Mfalume wangu, na Imulungu wangu,

yulaghitsa iwanu wa Yakobo wahume.

5 Kubitila ghweghwe, twetwe twowoyitsa kuchughu aduwi tsetu,

kwa litagwa lyako towakanyagha awala iwotwinukila.

6 Kwaapfila nene sihuwila upinde wangu baye,

wala lipanga lyangu ng'alidaha baye ukunikombola,

7 lekeni ghweghwe kutukombola kulawa kuna maaduwi tsetu,

na kuwaghela chinyala ghendo awala iwotwihila.

8 Twetwe tweghodela ghweghwe Imulungu wetu misi ngima,

na tutsolitunya litaghwa lyako matsuwa ghose.

9 Lekeni sambi apfino ghweghwe kutwasa, na kutughela chinyala,

na ng'ughenda kung'ondo baye hamwe na maasikali wetu.

10 Kututenda tuwatsume maaduwi tsetu,

na awala iwotuhila watuboka ipfinu pfetu.

11 Kututenda ka ng'olo wa kujighwa,

naghwe kutupwililisa kuna isi tsingi.

12 Kuwautsa chibohola iwanu wako,

wala ng'upatile chinu baye kwa kuwautsa wawo.

13 Kututenda twoneke twawabotsi na iwanu iwokala habei na twetwe,

na awala iwatutsunguluke wotuseka na wotubetsa.

14 Wanu wa isi tsingi wotutaniya,

wotubetsa aku wohighisa ghamatwi ghawo.

15 Nene noumbuka misi ngima,

na ichihanga changu nacho chakona chinyala,

16 hanihulika apfila pfawonibetsa na pfawondigha,

hambele ya aduwi yangu na ayula iyobama kundagha.

17 Aghano ghose ghatulawila

hata ka ng'atukusemwile baye ghweghwe,

wala ng'atulekile baye kulikinda lilaghano lyako.

18 Imimoyo yetu ng'aihunduke kuchughu baye,

wala ghamaghulu ghetu ng'aghabaghuke baye ghaileke inzila yako.

19 Lekeni kutuhonda honda hanu hawokala wambwa wa kumuhulo,

naghwe kutughubika na chisi totolo.

20 Ka tsatulisemwa litaghwa lya Imulungu wetu,

na kugholosa ghamoko ghetu kwa Imulungu mgheni,

21 pfihi Imulungu yang'alekile kulyona alyo?

Kwaapfila yeye koghamanya ghose ighapfisike mmoyo mwangu.

22 Kwaapfila twetwe twokomighwa misi ngima,

twakoneka ka ng'olo wa kuchinjighwa.

23 Ghwe MNDEWA, lamka! Hebali uwasa?

Winuke, uleke kutwasa matsuwa ghose.

24 Hebali utupfisa uhanga wako?

Heule wisemwa apfila pfatughanzika na pfatughaya?

25 Kwaapfila twetwe tuhulumsighwa mbaka hasi mna litimbwisi,

tsing'uli tsetu tsiwasa mwidongo.

26 Winuke, utse utwapfile,

na utukombole kwaapfila ghweghwe kwa mluso kuna twetwe.