1 Ghwe MNDEWA, Mulungu wangu, nene nikutsumila ghweghwe,

Unikombole na unilopole kulawa kwa awala wose iwoniwinza wandaghe,

2 Hela watsolutsaula ilukuli lwangu ka simba,

waludeghe pfihande pfihande bila kulawila munu wa kunikombola.

3 Ghwe MNDEWA, Imulungu wangu, ka nitenda chihile mna aghano,

ka mna ghamoko ghangu mna ghehile,

4 au nimliha ighehile imunu iyakalile tseghamba na nene,

lekeni si pfipfo baye! Nene nimkombola imunu iyanihile hela,

5 Aho mleke iaduwi yangu yaniwinge na yangoghe,

Yaubajughebajughe ugima wangu,

na kuniwatsisa mna litimbwisi.

6 Kwa imaya yako, Ghwe MNDEWA, winuke,

ukaimalitse imaya ya maadui tsangu,

winuke, Ghwe Imulungu wangu,

ghweghwe yuubama ihaki itendeke.

7 Na ghumtingano ghwa iwanu wa tsiisi ghukutsunguluke,

na ghweghwe uwatawale kulawa ako kuchanya.

8 Ghweghwe IMNDEWA yuyo yuhigha iwanu,

lelo nihamile nene, Ghwe MNDEWA,

unihighe kwa kulola ihaki yangu pfaili,

na kwa kulola ukutogholeka kwangu.

9 Ukumalitse ukwiha kwa wanu iwehile,

lekeni iwanu wana ihaki uwemise ghoya,

Ghwe Imulungu yuna ihaki, yughetsa imimoyo na tsiloho tsa wanu.

10 Imlungu yuyo ingao yangu,

yeye iyowakombola awala wana imimoyo inoghile.

11 Imulungu yuyo mlamtsi wa haki,

yeye kowaghudubukila iwanu wehile chila haukucha.

12 Munu iyolema kuleka ghehile, katsomnolela lipanga lyake,

upinde wake kaupfedula, na kawika ghoya.

13 Kamtengenetsela silaha tsa ukukoma,

na imishale yake itsakwaka milambi ya ghumoto.

14 Munu kughula usungu wa ukweleka ighehile,

inda iyakindile ya ughobo,

naye kakweleka ung'enye.

15 Kohimba lipondo na kolimalitsa,

kuya kakughwa imwenyegho mna lipondo liyahimbile.

16 Ghehile ghayatendile ghomuyila imwenyegho, na ughobo wake womughwila mna lilotsi lyake imwenyegho.

17 Nitsomlongela mighede IMNDEWA kwaapfila yeye kana ihaki,

Nitsakwimba nilitunye litaghwa lya IMNDEWA iyali kuchanya ng'ani.