Salmos 6

Ukulomba mna ghamatsuwa gha ukughaya

1 Ghwe MNDEWA, haughudubuka, uleke kunikembela,

na haukona imaya, uleke kuning’a adabu.

2 Umbonele libatsi, Ghwe MNDEWA, kwaapfila notsilika,

Ghwe MNDEWA, unihonetse, kwaapfila noghanzika mbaka mna imipate yangu.

3 Iloho yangu ighanzika sideke, Ghwe MNDEWA, ukutsa tsuwachi?

4 Uye, Ghwe MNDEWA, unilopole ugima wangu,

unikombole kwa apfila ghweghwe kumema uluso.

5 Kwaapfila imunu yafile ng’odaha baye kukumbuka ghweghwe,

wala imunu yali mna likabuli ng’odaha baye kukulongela ghweghwe mighede?

6 Nene nyipfa ghendo ukughuta,

chila chilo nochighebetsa ichinanda changu hanilila,

na ghamasotsi ghangu ghopfulumsa ligodolo lyangu.

7 Tsinenge tsangu tsiyauka kwa usungu,

tsiyauka kwa aghala ghawonitendela aduwi tsangu.

8 Mke mndeke, mwemwe wose imtenda ighehile,

kwa apfila IMNDEWA kahulika litsi lya ichililo changu.

9 IMNDEWA kahulika ukulomba kwangu, IMNDEWA katsakwidika chanilomba.

10 Adui tsangu wose watsoghelighwa chinyala, na watsopfuka ghendo,

watsakuya kuchughu, na baho watsohumbulighwa ghendo.