1 Ghwe MNDEWA, nitsokutunya kwaapfila kunyinula,

na ng'uwalekile baye aduwi tsangu waniseke.

2 Ghwe MNDEWA, Imulungu wangu, nikulilila ghweghwe unyapfile,

naghwe kunihonetsa.

3 Ghwe MNDEWA, kunikombola kulawa kutsimu,

kungaya keli ugima,

kundapfa ndeke kughenda hamwe na awala iwoghenda kutsimu.

4 Mwimbileni IMNDEWA wila wa kumtunya,

mwemwe iwanu wake iwotogholeka,

mkumbuke apfila pfayelile na mlongeleni mighede.

5 Kwaapfila imaya yake yokala chidogho,

na uluso wake wokala matsuwa ghose,

chililo chodaha kukala chilo chose,

lekeni ukudeng'elela kwakutsa nemitondo.

6 Na nene hanikalile nibweda tsanilonga,

"Sitsohighisika ghendo baye!"

7 Ghwe MNDEWA, kwa uluso wako,

kunitenda nime ghoya ka ichidunda chikulu,

lekeni haunipfisile uhanga wako, nene nighanzika.

8 Nikulilila ghweghwe, Ghwe MNDEWA,

na nimlomba IMNDEWA mbonelighwe libatsi.

9 Angu utsopata choni nene ning'afa?

Na utsobweda choni nene hanitsikighwa kukabuli?

Pfihi litimbwisi litsokulongela ghweghwe mighede?

Au litsolonga apfila ghweghwe pfautogholeka?

10 Uhulike, ghwe MNDEWA, umbonele libatsi;

Ghwe MNDEWA, unyapfile.

11 Ghweghwe kukutenda ukulila kwangu kuwe kubigha,

kunitsula ligwanda lya ghunila kunipfatsa ukudeng'elela,

12 ili ghumoyo ghwangu ghukutunye ghweghwe,

na ghuleke kwinyamala,

Ghwe MNDEWA, Imulungu wangu,

nene nitsokulongela mighede matsuwa ghose.