1 Ghweghwe imunu yuna ingupfu, hebali wighodela ighehile?

Ambe uluso mkulu wa Imulungu wabaho matsuwa ghose!

2 Ilulimi lwako lwopanga ukuhinyahinya kuliyeka,

ilulimi lwako pfaluli ka chiwembe ichitema,

ghweghwe yubugha wayagho.

3 Kokunda ighehile kubita ighanoghile,

na kokunda ukughutsuka kubita ukulongesa.

4 Kokunda tsimbuli tsose itsiwalagha iwanu,

ghwe lulimi luna ung'enye.

5 Lekeni Imulungu katsokudeghadegha mna ghamatsuwa ghose,

katsokunyakula yakudeghedeghe kulawa mna ing'anda yako,

na katsokung'ola ghendo kulawa mna isi ya iwali wagima.

6 Nawo iwanu wana ihaki hawatsakona alyo, watsopfuka,

watsomseka na watsolonga apfino,

7 "Loleni ighamlawile imunu ayuno,

yeye yang'amtendile baye Imulungu yawe hanu hake ha ukutsumila,

lekeni tsakehuwila tsimali tsake tsili nyingi,

tsimali tsayapatile kwa ukuwalagha iwanu."

8 Lekeni nene neghala na ghumbiki ghwa mtseituni,

ighumela ghoya mna ing'anda ya Imulungu,

nehuwila Imulungu yana uluso mkulu,

iyotukunda matsuwa ghose ing'aghohupa.

9 Nitsolonga mighede kuna ghweghwe Imulungu,

kwa aghala ghautendile,

na nitsehuwila litaghwa lyako, kwaapfila linogha,

nitsokutunya hambele ha iwanu wako iwotogholeka.