1 Unihighe, ghwe MNDEWA,

kwaapfila nene ng'ala aku nahela totso,

nani nihuwila IMNDEWA, bila kuya kuchughu.

2 Ghwe MNDEWA, unikaghule na undole,

ughetse ghumoyo ghwangu na ghamawatso ghangu tsangu,

3 Mana uluso wako mkulu wa hambele ha tsinenge tsangu,

nani nokala mna ukulongesa kwako.

4 Sikala na iwanu iwang'enye baye,

wala sikwanga na awala iwebalaghutsa baye.

5 Noghuhila ghumtingano ghwa iwanu iwotenda ighehile,

na sitsokala baye hamwe na iwanu wehile.

6 Nonawa ghamoko ghangu kulangusa ka nene nahela totso,

na noitsunguluka imatsabahu yako, ghwe MNDEWA,

7 aku nokemelelela nolonga mighede,

na kutsisima tsing'onde tsa ukukangawatsa tsautendile.

8 Ghwe MNDEWA, nohakunda hanu haukala ha ing'anda yako,

na hanu haukala utunitso wako.

9 Uleke kunikoma hamwe na iwanu wana tsinzambi,

na hamwe na iwokoma iwanu,

10 awala iwotenda ighehile kwa ghamoko ghawo,

na awala iwobokela hongo kwa ghumoko ghwawo ghwa kujilo.

11 Lekeni nene nitsokala kwa ukutenda ighagholoke,

umbonele libatsi na unikombole.

12 Ghumghulu ghwangu ghwima hanu ihatindimale,

mna imitingano nitsomtunya IMNDEWA.