1 Mlongeleni IMNDEWA mighede, kwaapfila yeye kanogha,

na uluso wake mkulu wokala matsuwa ghose ing'aghohupa.

2 Leka awala iwakombolighwe na IMNDEWA walonge apfo,

awala iyawakombole kulawa kuna ghumoko ghwa maaduwi,

3 awala iyawabweletse kulawa isi tsingi, kulawa mashariki,

kulawa magharibi, kulawa kaskazini, na kulawa kusini.

4 Wamwenga watangatanga kunyika,

ng'awonile inzila ya ukuwaghala kuna mji ghwa ukukala baye.

5 Wona inzala, na wona ing'ilu,

nawo wang'ali wotsilika.

6 Baho hawang'ali woghanzika, wamlilila IMNDEWA,

naye kawakombola kulawa mna ghamaghayo ghawo.

7 Kawalongotsa mna inzila igholoke,

waghenda mbaka kuna ghumji ghwa ukukala.

8 Waleke wamlongele IMNDEWA mighede, kwa uluso wake mkulu,

na kwa ghamatendo ghake gha ukukangawatsa ghayawatendele iwanu.

9 Kwaapfila yeye kohotsa ilumelo luna ing'ilu,

na imunu yana inzala kommemetsa ighanoghile.

10 Awala iwakalile mna ichisi, na mna ichisi totolo,

wohighwa mna ghamaghayo na iminyololo ya ichuma,

11 mana waghalema ghamalonga gha Imulungu,

na waghabetsa ghamalaghitso gha Iyali Kuchanya Ng'ani.

12 Tsawepfa ghendo kwa ukusang'ana ng'onde ng'omu,

apfo waghwa hasi na ng'ahakalile na munu wa ukuwapfila baye.

13 Hawang'ali woghanzika wamlilila IMNDEWA,

naye kawakombola na ghamaghayo ghawo.

14 Kawalapfa kulawa kuna ichisi na mna ichisi totolo,

na tsipingu tsawo katsibenabena.

15 Waleke wamlongele IMNDEWA mighede, kwa uluso wake mkulu,

na kwa ghamatendo ghake gha ukukangawatsa ghayawatendele iwanu.

16 Kwaapfila yeye koghabomola na koghapfughula ghamalango gha shaba,

na koghabebena ghamakufuli gha ichuma.

17 Iwanu wamwenga wawa wabotsi kwaapfila tsawatenda nzambi,

waghaya kwaapfila tsawatenda ighehile.

18 Wapfihila ipfijo pfose,

wakala chidogho wafe.

19 Hawang'ali woghaya wamlilila IMNDEWA,

naye kawakombola na ghamaghayo ghawo.

20 Kwa lilonga lyake, kawahonetsa,

naye kawatenda waleke ukukomighwa.

21 Leka wamlongele IMNDEWA mighede,

kwa uluso wake mkulu,

na kwa ghamatendo ghake gha ukukangawatsa ghayawatendele iwanu.

22 Wamlapfile tsinambiko tsa mighede,

waghalonge ghamatendo ghake kwa ukwimba wila wa ukudeng'elela.

23 Awala iwaghendile kwa tsimeli mna ibahali,

na awala iwatendile tsisang'ano mna ghamatsi mengi,

24 awo watsona tsisang'ano tsa IMNDEWA,

na ipfinu pfa ukukangawatsa kuna ghamatsi ighaghendese.

25 Yeye kalaghitsa, na baho inyahemu iduma,

katenda ghamawimbi ghahefuke mna ibahali.

26 Wenuka kuchanya kulanga, kuya woya hasi ghendo,

kwa alino lihile ililawile iwanu iwali mna tsimeli watenyuka ghendo.

27 Watsenzeuka na waghudema kulonga iwanu iwapatike,

ukumanya kwawo kwose kumala.

28 Nawo hawang'ali woghaya, wamlilila IMNDEWA,

naye kawakombola kulawa mna ghamaghayo ghawo.

29 Kaitenda inyahemu inyamale tulu,

na ghamawimbi gha ibahali ghenyamala tulu.

30 Baho ghamawimbi haghanyamale wadeng'elelela ng'ani,

naye kawalongotsa mbaka kuna ibandali yawabamile ukughenda.

31 Leka wamlongele IMNDEWA mighede,

kwa uluso wake mkulu,

na kwa ghamatendo ghake gha ukukangawatsa ghayawatendele iwanu.

32 Na wamwinule yeye mna ghumtingano ghwa iwanu,

na wamtunye mna libalatsa lya iwanzehe.

33 Yeye kaighalusa imito iwa nyika

na tsimbwibwi tsa ghamatsi tsiwa dongo lisakale.

34 Isi ikweleka ghamatunda iwa isi ya mkele,

kwaapfila iwanu iwang'ali wokala amwo tsawatenda ghehile.

35 Yeye katenda inyika iwa matsimbu gha ghamatsi,

na isi isakale iwa mbwibwi tsa ghamatsi.

36 na kawatenda iwanu wana inzala wakale aho,

nawo wetengenetsela mji ghwa ukukala.

37 Walima imighunda, na wahanda iminzabibu,

nayo yeleka ghamatunda ketseketse.

38 Naye kawabariki wongetseka ng'ani,

na imifugho yawo ighendelela ukongetseka.

39 Kuya wahunguka wawa chidogho, na wawa nyondenyonde,

kwaapfila tsawaonelighwa,

tsawadununzighwa na waghelighwa usungu,

40 Kawatenda wahumbuke,

na kawatenda wangewange mna inyika ilihela nzila.

41 Lekeni iwanu iwali hela chinu kawenula kawalapfa mna ghamaghayo,

na katsongetsa tsikaye tsawo ka mipfugho.

42 Iwanu wana imimoyo inoghile watsoghona aghano nawo watsodeng'elela,

na iwanu wose wehile watsodiwa imilomo yawo.

43 Imunu iya ihekima yaghapfikitse aghano,

lekani iwanu wapfikitse uluso mkulu wa IMNDEWA.