1 Ghwe MNDEWA, haughudubuka uleke kunikembela,

na haukona maya, uleke kunitowa.

2 Mana imishale yako inihoma,

na ghumoko ghwako ghunididimitsa

3 Kuduhu ugima mna ilukuli lwangu,

kwaapfila kunighudubukila,

na mipate yangu yahela ugima kwaapfila nene nina tsinzambi.

4 Tsinzambi tsangu nyingi mno,

tsiwa ka mtsigho ing'aghudutika baye kuna nene.

5 Imilonda yangu yola na yonung'a,

iwa apfo kwaapfila nene tsa nambotsi.

6 Mbaka ilukuli lwangu lupfeduka na lwinama,

nene noghenda nidomboketsa misi yose.

7 Mana ghmghongo ghwangu chakwaka ghumoto ghuliyeka,

ilukuli lwangu lwose ng'alukona ng'apfu baye.

8 Nene na nyonde nyonde na nahela ngupfu ghendo,

noghutilila kwaapfila ghumoyo ghwangu ghuna usungu.

9 Ghwe MNDEWA, ghose ghanibama gha hambele hako,

na ukughuta kwangu ng'akupfisike baye kuna ghweghwe.

10 Ghumoyo ghwangu ghopwita pwita,

na tsingupfu tsangu tsimala ghendo,

mbaka tsinenge tsangu ng'atsikona ghoya baye.

11 Mbwigha tsangu na wayangu iwali habehi wonihepa kwaapfila nene nina pfilonda,

na iwanu wa ilukolo lwangu wakwima kutali.

12 Awala iwoubama ugima wangu weka imitegho,

na awala iwobama kunilagha wolonga pfawatsonilagha,

na wopanga mbuli tsa ughutsu misi yose.

13 Nene na ka munu chitsiwi, ing'ayodaha baye kuhulika,

na ka chibubu ing'ayodaha ukulonga baye.

14 Nene niwa ka imunu ayula ing'ayohulika baye,

ing'ayodaha ukwidika baye.

15 Lekeni Ghwe MNDEWA, nene nokubeta ghweghwe,

Ghwe MNDEWA, Imulungu wangu, kutsonyidika.

16 Kwaapfila nene tsanilongela, "Maaduwi tsangu waleke kutsa kuniseka,

au ukwighoda ahala nene hanikughwa."

17 Mana nene nahabehi na ukughwa,

usungu wangu ng'aunilawa baye.

18 Kwaapfila nitsolonga ghamatotso ghangu,

na kusing'inika kwa tsinzambi tsanendile.

19 Maaduwi wa ugima wangu wawengi na wana ngupfu,

na awala iwonyihila hela pfipfila wawengi.

20 Awala iwoniliha ighehile kwa ighanoghile ghaniwatendele,

wonibangitsila hela kwa apfila nene nowinza ighanoghile.

21 Uleke kunileka Ghwe MNDEWA,

Ghwe Imulungu wangu,

uleke kukala kutali na nene.

22 Sumka utse unyapfile, Ghwe MNDEWA, yunikombola.