1 Mwemwe muwanu wose, mtoweleni ghamakofi,

na mumdeng'elele Imulungu kwa kumtowela imilutsi na lukenze.

2 Kwaapfila IMNDEWA, Iyali Kuchanya Ng'ani, ka wakupfukighwa,

yuyo iyali mfalume mkulu, iyoitawala isi yose.

3 Kotwapfila tuwahume iwanu,

na koweka hasi ha ghamaghulu ghetu.

4 Katusaghulila isi aino iwe yetu,

isi iyeghodela Yakobu iyanoghelighwe naye.

5 Imulungu kagheluka uchanya na ilukenze,

na litsi tsa tsimalati tsihulikika IMNDEWA hayagheluke.

6 Mwimbileni Imulungu, mwimbe,

mwimbileni mfalume wetu, mwimbe.

7 Kwaapfila Imulungu yuyo mfalume wa isi yose,

mwimbileni tsiwila tsa ukumtunya.

8 Imulungu kotawala tsiisi tsose,

Imulungu kokala mna ichighoda chelile cha ufalume.

9 Iwakulu wa tsiisi wetingana hamwe,

wawe chinu chimwe na iwanu wa Imulungu wa Abrahamu,

kwaapfila yeye kana ngupfu kubita iwafalume wose iwali muisi,

Yeye kenulighwa ng'ani ghendo.