1 Pfinogha ghendo kulonga mighede kwa IMNDEWA,

na ukulimbila litaghwa lyako, ghweghwe Yuli Kuchanya Ng'ani,

2 Pfinogha ghendo kutangatsa uluso wako chila hamitondo,

na kutangatsa apfila pfautogholeka chila nechilo,

3 aku notowa malati lina nyutsi kumi,

na notowa ching'weng'we, na chinubi.

4 Ghwe MNDEWA, aghala ghautendile ghonitenda nene nideng'elele.

nitsakwimba kwa ukusekelela kwa aghala ghautendile kwa ghamoko ghako.

5 Ghwe MNDEWA, aghala ghautendile makulu ng'ani

na ghaupfika pfipfila makulu ng'ani.

6 Imunu yalihela tsimbutsi ng'oghatanga baye,

wala imunu mbotsi aghano ng'odaha kughamanya baye.

7 Iwanu iwehile wodaha kukula ka mitsani,

iwotenda ighehile wodaha kubweda mna chila chinu,

lekeni wotsighila kuna ukuhinyighwa matsuwa ghose ing'aghohupa.

8 Lekeni ghweghwe MNDEWA, kutsakwinulighwa matsuwa ghose ing'aghohupa.

9 Ghwe MNDEWA, lola maaduwi tsako awano hano,

maaduwi tsako awo watsokomighwa ghendo,

na awala wose iwotenda ighehile watsopwililika.

10 Lekeni ghweghwe kungaya ingupfu ka ya mbogho.

aku kunighidila ghamapfuta ighanoghile mchanya mwangu.

11 Tsinenge tsangu tsona apfila maaduwi tsangu pfawaghwile,

na maghutwi ghangu ghahulika apfila iwanu iwehile pfawotsoghaya.

12 Imunu yana ihaki katsomela kama mbiki ghwa mtende,

katsakwenela kama mkataluba ghwa Lebanoni,

13 na awala iwahandighwe mna ing'anda ya IMNDEWA watsakwenela mna ipfibwalu pfa Imlungu wetu.

14 Watsakweleka ghamatunda mbaka hawakuwa wanzehe,

watsoneneha na kudegheta,

15 watangatse ka IMNDEWA, kana ihaki,

yeye yuyo libambalawe lyangu, na mghati mwake mduhu tsuluma.