1 Ghwe MNDEWA, mfalume kodeng'elela tsingupfu tsako,

lola pfayobweda ghengo ahala haumtenda yahume.

2 Kumwing'a achila chaghubamile ghumoyo ghwake,

na achila chayakulombile kwa ghumlomo ghwake ng'umwimile baye.

3 Kwaapfila kumtsila kumghweka pfinu pfinoghile,

na mwitwi mwake kumpfatsa taji ya nzahabu.

4 Kakulomba ugima, naghwe kumwing'a,

kumwing'a ugima wa matsuwa mengi, ghamatsuwa ing'aghomala baye.

5 Ukuhuma kwaumwapfile kumwongetsela iheshima,

kumwing'a ukulu na ukutunyighwa.

6 Komwing'a tsibalaka ing'atsihupa matsuwa ghose,

komtenda yadeng'elele na kusekelela hayakuwa hambele hako.

7 Kwaapfila mfalume kehuwila IMNDEWA,

na kehuwila uluso wa ayula iyali kuchanya ng'ani,

apfo lelo yeye ng'atsohighisika baye.

8 Ghumoko ghwako ghutsowaghogha aduwi tsako wose,

ona, ghumoko ghwako ghwa kujilo ghutsowaghogha awala iwokuhila.

9 Aho hautsowalawila, kutsowatenda wawe kama tanulu lya ghumoto,

IMNDEWA katsowaghudubukila na katsowametsa, na ghumoto ghutsowalambita.

10 Iwana wawo kutsowahinya kulawa mna isi,

na ilweleko lwawo kulawa mna iwanu.

11 Kwaapfila tsawabama wakutendele ghehile,

na imitsengwe yawo yawekile ng'awatsoitenda baye.

12 Kwaapfila hautsowasila imishale yako,

watsohunduka watsume.

13 Lelo winuke ghwe MNDEWA, kwaapfila kuna ng'apfu,

na twetwe tutsakwimba tutsideng'elele tsingupfu tsako.