1 IMNDEWA yatunyighwe! Mlongeleni IMNDEWA mighede,

kwaapfila yeye kanogha,

uluso wake mkulu wokala matsuwa ghose ing'aghomala.

2 Nani iyodaha ukughalonga ghamatendo makulu gha IMNDEWA?

Yuhi iyodaha ukumtunya pfaibamighwa?

3 Wabweda awala iwokinda ighagholoke,

awala iwoghendelela ukutenda ihaki.

4 Unikumbuke Ghwe MNDEWA, ahala hauwatendela ighanoghile iwanu wako,

utse unyapfile ahala hauwakombola,

5 nidahe kwona apfila pfawobweda iwanu wako yauwasaghule,

ili nideng'elele ka iwanu wa isi yako pfawodeng'elela,

na nikutunye hamwe na iwanu wako.

6 Twetwe tutenda nzambi, hamwe na iwahenga wetu,

tutosa na tutenda ighehile.

7 Iwahenga wetu ako Misiri,

ng'awatlangitse baye ghamatendo ghako gha ukukangawatsa,

wala ng'awaghakumbuke baye uluso wako mkulu wauwatendele,

lekeni wakubiduka ghweghwe hana ibahali ya Shamu.

8 Hata apfo kawakombola ka pfayalongile,

ili yatende tsingupfu tsake tsimanyike.

9 Kaikembela ibahali ya Shamu nayo inyala ghendo,

naye kawabititsa amwo kulunga wobita mna inyika.

10 Kawakombola kulawa mna ghumoko ghwa iwanu iwehile,

na kawakombola mna ghumoko ghwa maaduwi tsawo.

11 Ghamatsi ghawaghubika aduwi tsawo,

na ng'ahonile hata munu yumwe baye.

12 Baho waghatoghola ghamalonga ghake,

wamwimbila tsiwila tsa ukumtunya.

13 Lekeni bila kukawa waghasemwa aghala ghayawatendele,

wala ng'awabetile baye achila chayalongile Imulungu.

14 Wona basu kulu akula kunyika,

na kuko wamghetsa Imulungu.

15 Apfo kaweng'a achila chawabamile,

lekeni kawaghalila utamu wa kuwatenda wasoke.

16 Kuna indalo wamwonela gele Musa,

na Haruni, imunu iyelile wa IMNDEWA,

17 baho lidongo lipfughuka limmetsa Datani,

na limghubika Abiramu hamwe na likingili lyake,

18 ghumoto ghuwalakatsa awala iwelongotse nawo,

lilambi lyake liwalambita awanu awo iwehile.

19 Ako Horebu watengenetsa indama wa nzahabu,

kuya wachinamila ichinyagho acho cha inzahabu cha ukulubula.

20 Baho waleka ukumwinamila Imulungu yana utunitso,

wanza ukutambikila ichinyagho cha imnyama iyakuja imitsani.

21 Wamsemwa Imulungu, iyawakombole,

iyatendile makulu akula Misiri,

22 na yatendile pfinu pfa ukukangawatsa kuna isi ya Hamu,

na ghamatendo gha ukukangawatsa kuna ibahali ya Shamu.

23 Imulungu tsakalonga yang'awakomile ghendo,

lekeni Musa imunu wake iyamsaghule tsakengilila,

kaihotsa imaya yake, yaleke ukuwakoma.

24 Kuya wailema isi aila inoghile,

ng'awalitoghole baye achila chayalongile.

25 Walonganika mna ghamahema ghawo,

wala ng'awahulikitse baye litsi lya IMNDEWA.

26 Apfo Imulungu kenula ghumoko ghwake kelaha,

ka yang'awakomile kunyika,

27 na iwana wawo yang'awasile kuna tsiisi tsa iwanu,

na katsowapwililisa mna isi yose.

28 Kuya welunga wamtambikile mulungu Baali wa Peori,

waja tsinambiko itsitambikilighwe imitsimu.

29 Wamtenda IMNDEWA yaghudubuke kwa ghamatendo ghawo,

na baho utamu wa tauni uwaghwila.

30 Lekeni Finehasi kenuka kema haghati,

na utamu aula umala.

31 Kwa alino yeye koneka ka imunu yana ihaki,

kulawa pfeleko mbaka pfeleko matsuwa ghose ing'aghomala.

32 Hana ghamatsi gha Meriba wamtenda IMNDEWA yaghudubuke,

na kwa alyo wamhonza Musa,

33 kwaapfila tsawamtenda Musa yone usungu mna iloho yake,

apfo ghumlomo ghwake ghulonga mbuli tsa ubotsi.

34 Ng'awawakomile baye iwanu wa tsiisi,

ka apfila IMNDEWA pfayawalaghitse,

35 lekeni wehanganya iwenyegho na iwanu wa tsiisi,

na wefunda ghamatendo ghawo,

36 wapfitambikila ipfinyagho pfawo,

napfo pfiwa mitegho kuna wawo.

37 Nawo wawalapfa iwana wawo na neghe tsawo,

wawe nambiko tsa ukulakatsighwa kwa imitsimu.

38 Wamwagha idamu ya iwana wawo na neghe tsawo iwalihela matotso,

awo iwawalapfile wawe nambiko kwa ipfinyagho pfa isi ya Kanaani,

na idamu yawo iitenda isi ihe.

39 Wetenda iwenyegho wehe kwa tsisang'ano tsawo,

na kwa ghamatendo ghawo woneka watenda ughoni kwa Imulungu.

40 Apfo IMNDEWA kawonela maya iwanu wake,

naye kawehila ng'ani awala iwali wake.

41 Kawatenda iwanu wa isi tsingi wawahume,

nawo iwawehile wawatawala.

42 Aduwi tsawo wawaonea,

na wawatenda wawatumikile.

43 IMNDEWA kawakombola iwanu wake mala nyingi.,

lekeni wawo wambiduka yeye mna imipango yawo,

nawo waghendelela ghendo na ighehile ghawo.

44 Lekeni IMNDEWA kawona apfila pfawang'ali wodununzika,

na kahulika ichililo chawo ahala hawamlilile yawapfile.

45 Baho kalikumbuka lilaghano lyake,

na kwa uluso wake mkulu ng'ani kahotsa imaya yake.

46 Kawatenda aduwi tsawo wose iwawaghoghile wawonele libatsi.

47 Tukombole, ghwe MNDEWA, Imulungu wetu,

utubweletse kulawa kuna tsiisi,

ili tulilongele mighede litaghwa lyako ilyelile,

na twighode mna utunitso wako.

48 Yatunyighwe IMNDEWA, Imlungu wa Isiraeli,

tangiya matsuwa ghose ing'aghohupa mbaka matsuwa ghose ing'aghohupa.

Na iwanu wose walonge, "Ona pfipfo!" IMNDEWA yatunyighwe!