1 Mwimbileni Imulungu kwa ukudeng'elela, yeye iyali tsingupfu tsetu,

mtoweleni lukenze Imulungu wa Yakobu.

2 Mwanze ukwimba, mtowe tsingoma

mtowe malati, na ichinanda.

3 Kemeleleni kwa ukutowa tsimembe tsa ng'olo ahala ghumwetsi haghulawa,

na ahala ghumwetsi haghukwenela, mna litsuwa lya ichihungo chetu.

4 Kwaapfila alyo laghitso kwa Isiraeli,

na ghamalaghitso gha Imulungu wa Yakobu.

5 Tsakaweng'a iwanu wa Isiraeli laghitso alyino,

hayaghendile kuitowa isi ya Misiri.

ako tuhulika ilugha ing'atuimanyile baye,

6 "Niwatula imitsigho mitito kulawa mna ghamayegha ghawo,

ghamoko ghawo ghaleka ukughala keli imitsigho.

7 Haung'ali koghanzika ghweghwe tsakunikema, nani nikukombola,

nikwidika kwa ukuduma kulawa mna ghamawingu,

nikughetsa ahala hana ghamatsi gha Meriba.

8 Hulikitseni mwemwe iwanu wangu, mnileke niwakanye,

Ghwe Isiraeli, ng'apfu ung'anitegheletse!

9 Mleke kuwa na mulungu mgheni mna mwemwe,

wala mleke kumwinamila mulungu yungi.

10 Nene na IMNDEWA, Imulungu wenu,

yaniwalapfile kulawa isi ya Misiri,

mwasame ghumlomo ghwenu na nene nitsowang'itsa.

11 Lekeni iwanu wangu ng'awahulikitse baye litsi lyangu,

na Isiraeli ng'awanibamile ghendo baye.

12 Apfo niwaleka waghendelele kuwa wasughu mna imimoyo yawo,

na waghendelela ukutenda aghala ghawobama iwenyegho.

13 Ng'apfu iwanu wangu wang'anihulikitse,

ka Isiraeli wang'awinzile tsinzila tsangu,

14 ning'asumke kuwatowa maaduwi tsawo,

na ghumoko ghwangu ghung'awatowile awala iwowadununza.

15 Na awala iwomuhila IMNDEWA wang'atowile ghamagoti,

ukughaya kwao kung'awile kwa matsuwa ghose ing'aghomala.

16 Lekeni mwemwe Waisiraeli ning'aweng'ile ingano inoghle ghendo mje,

na ukwi iulawa kuna libambalawe."