1 Umbonele libatsi, Ghwe Imulungu,

kwaapfila ghweghwe kwamluso,

ughaleghuse ghamatotso ghangu,

kwaapfila ghweghwe kuna batsi kulu.

2 Unyopfughe ghendo na ukwiha kwangu kwose,

na unitende nyele kwa tsinzambi tsangu.

3 Kwaapfila nene nighamanya ghamatotso ghangu,

na inzambi yangu ya hambele hangu matsuwa ghose.

4 Nene nikutendela nzambi ghweghwe uliyeka,

na nitenda ighehile hambele ha tsinenge tsako,

apfo ghweghwe kolengesa haulonga nene nitotsa,

na kolamla ghoya hauihigha.

5 Ona nene nitenda ghehile tangiya hanyoneke,

nina nzambi tangiya hanikalile muinda mwa mamo wangu.

6 Lola! Ghweghwe kobama igholongesa igholawa mghati,

apfo unifunde ihekima yako mmoyo mwangu.

7 Unyopfughe tsinzambi tsangu kwa mirtsani ya hisopo, nani nitsakuwa nyela,

unyopfughe, na nitsakuwa mtselu chwee kubita iseluji.

8 Unitende nideng'elele na nisekelele,

impate yauihondile hondile nayo ideng'elele.

9 Uupfise uhanga wako uleke ukutsilola tsinzambi tsangu,

na ghamatotso ghangu ghose ughabaghuse.

10 Ghwe Imulungu, uniumbile moyo ghwelile,

wike iloho ya sambisambi na itogholeka mghati mwangu.

11 Uleke kunyasa kulawa hauli,

wala Iloho yako yelile uleke kuniboka.

12 Umbuyitsile ukudeng'elela ikulawa mna ukombotsi wako,

itende iloho yangu ikutoghole ghweghwe.

13 Apfo na nene nitsowafunda tsinzila tsako awala iwototsa,

na iwana tsinzambi watsokuyila ghweghwe.

14 Unikombole na litotso lya ukuwakoma iwanu,

Ghwe Imulungu, Imulungu wa ukombotsi wangu,

na ilulimi lwangu lutsakwimba ihaki yako kwa kukemelela.

15 Ghwe MNDEWA, uyasame imilomo yangu,

na ghumlomo ghwangu ghutsokutunya ghweghwe.

16 Mana ghweghwe ng'unoghelwa na tsinambiko baye,

ka konoghelwa natso nene ning'akulapfile,

wala ng'udeng'ela baye tsinambiko tsa ukulakatsighwa.

17 Tsinambiko tsa Imulungu iyo iloho ihondeke,

ghumoyo ighuhondeke na ghwa ukwihulumsa, ghwe Imulungu, ng'ughubetsa baye.

18 Ughutendele ghanoghile ghumji ghwa Sayuni, kwa uluso wako,

uitsenge imibanda ya Yerusalemu.

19 Baho hautsonoghelwa na tsinambiko tsa haki,

na tsinambiko tsa ukulakatsighwa, na tsa kulatsighwa mnyama mgimamgima

kuya iwanu watsokulapfila wang'ombe wamale mna imatsabahu yako.