1 Ghwe IMNDEWA, unikombole na iwanu iwehile,

unikinge na iwanu iwaghobo.

2 Iwanu awo wopanga ghehile mna imimoyo yawo,

na wotenda ing'ondo ilawile chila tsuwa.

3 Wonola imilimi yawo iwe mikali ka ya nzoka,

na mna imilomo yawo mna ghamalonga ghehile ka isumu ya moma

4 Ghwe IMNDEWA, unikinge na ghamoko gha iwanu wehile,

na unikinge na iwanu iwokoma wayao,

iwobama kunighwisa nene.

5 Iwanu wana ichidandali waniteghela imitegho,

watandatsa imitsabi ka lwapfu,

weka imitegho mnzila wanighoghe.

6 Ghwe IMNDEWA, "Ghweghwe kwa Imulungu wangu." Uhulike ichililo changu,

na umbonele libatsi.

7 Ghwe IMNDEWA,

Mkombotsi wangu, yuna ingupfu,

unikinge nene mna ing'ondo.

8 Ghwe IMNDEWA uleke kuweng'a iwanu wehile ghawobama,

wala ghehile ghawobama ukutenda ghaleke ukutendeka.

9 Uleke kuwatenda maaduwi tsangu wanihume,

na ighehile igholawa mna imilomo yawo ghawoyile iwenyegho.

10 Ghamakala gha ghumoto ghawaghwile,

wasighwe mna ghumoto, na kuna ghamapondo

na waleke kiulawa keli.

11 Awala iwowadeta wayao waleke kupata chinu chochose mna isi,

ghehile ghawapate na wakomighwe ghendo.

12 Ghwe IMNDEWA, nomanya koweng'a iwahingwa ihaki yawo,

na kowamila awala iwodununzika.

13 Ona ghendo, iwanu wana ihaki watsokutunya ghweghwe,

na watsokala hambele hako.