1 Hulikitseni, mwemwe iwanu wangu, aghala ghaniwafunda,

mtegheletse ghamalonga gha ghumlomo ghwangu.

2 Nitsofumbula ghumlomo ghwangu kwa ng'ungo,

nitsolonga ipfitendawili pfa tangiya ghumwande,

3 apfila pfatuhulike na kupfimanya, pfawatupetele iwahenga wetu.

4 Tutsowalongela iwanu wetu bila chipfiso,

na tutsowalongela lweleko lungi,

ghamatendo gha ukutunyighwa gha IMNDEWA,

na tsingupfu tsake, na ghamatendo gha ukukangawatsa ghayatendile.

5 Yeye keka imiko kwa Yakobu, na keka ghamalaghitso kwa Isiraeli,

ghayawalaghitse iwahenga wetu wawafunde iwana wawo,

6 ili ilweleko ilukutsa waghamanye,

awala iwatsakwoneka hambele,

kuya nawo wenuke wawapetele iwana wawo.

7 Nawo watsomtenda Imulungu yawe wa ukwihuwila,

waleke kughasemwa aghala ghayatendile Imulungu,

lekeni walangitse kughakinda ghamalaghitso ghake.

8 Kuya waleke kwighala na iwahenga wawo,

iwakalile lweleko luna iwanu wasughu na iwombiduka,

iwanu wana imimoyo mikomu,

nawo ng'awamtoghole baye Imulungu mna imimoyo yawo.

9 Iwanu wa Efuraimu, iwakindile tsisilaha tsawo tsa upinde na mishale,

woya kuchughu mna litsuwa lya ing'ondo.

10 Ng'awalikindile baye lilaghano lya Imulungu,

walema ukukala ka pfaghobama ghamalaghitso ghake.

11 Nawo waghasemwa aghala ghayatendile,

na ipfinu pfa ukukangawatsa pfayawonese.

12 Katenda ipfinu pfa ukukangawatsa hambele ha iwahenga wawo,

mna isi ya Misiri, kuna imighunda ya Soani.

13 Kaighola ibahali na kawalosa iwanu kumwambu,

kaghemitsa ghamatsi kulonga ubanda.

14 Kawalongotsa kwa libingu nemisi,

na chilo chose kwa ghumwanga ghwa ghumoto.

15 Katula ghamabambalawe kunyika,

kawanwesa ghamatsi mengi ka matsi ighaghendese igholawa hasi.

16 Naye kalapfa ipfikolongo kulawa mna libambalawe,

na katenda ghamatsi ghahulumke kama mto.

17 Lekeni waghendelela ukumtendela tsinzambi,

wamlema kunyika Yeye Iyali Kuchanya Ng'ani.

18 Wamghetsa Imlungu mmimoyo mwawo,

kwa kubama ichijo kwa libasu lyawo.

19 Kuya wamlonga Imlungu,

"Phihi Imulungu kodaha kutwing'a chijo tuje kunyika?

20 Lola, yeye katowa libambalawe ghamatsi ghalawa mengi kulonga mito.

Pfihi pfipfila kodaha kutwing'a ichijo?

Au pfihi katsoweng'a nyama iwanu wake?"

21 IMNDEWA hayahulike agho kaghudubuka ng'ani.

Moto ghuwakila iwanu wa Yakobu,

pfipfila kawonela maya ng'ani Waisiraeli,

22 kwa apfila ng'awamtoghole Imulungu baye,

wala kwihuwila ukombotsi wake.

23 Hata apfo kaghalaghitsa ghamabingu ighali kuchanya,

na imilango ili kulanga kaipfughula,

24 naye kawahulumsila imana ka mvula waje,

kaweng'a ghumtama kulawa kulanga.

25 Chila munu kaja ichijo chawajile wamalaika,

kawaghalila ichijo bwelele.

26 Kalitenda libeho ililawa mashaliki lidume kulanga,

na kwa tsingupfu tsake kalitenda libeho ililawa Kusini lidume.

27 Kawamwaghila inyama kama timbwisi,

pfideghe iwoghuluka wengi kulonga msanga ghwa ibahali.

28 Kawatenda waghwe mna indalo yawo,

kutsunguluka ghamahema ghawo.

29 Nawo waja mbaka waleka,

mana kaweng'a achila chawonele libasu.

30 Hawakalile ng'ana wamalitse baye achila chawasulukile,

ichijo haching'ali cha umlumo mwawo,

31 imaya ya Imlungu iwakila moto,

naye kawakoma iwakalile na ngupfu mna wawo,

na iwasongolo wawo kawenamitsa.

32 Hamwe na aghano ghose waghendelela kutenda nzambi,

nawo ng'awatoghole baye ipfinu pfa kukangawatsa pfayatendile.

33 Apfo kaghatenda ghamatsuwa ghawo ghahupe kulonga muhe,

na kaitenda imiyaka yawo ihupe kwa ukuwaghalila maghayo gha ukwidukitsa.

34 Chila hayawakomile, baho hawambamile na kumuyila,

nawo wambama Imulungu kwa ghumoyo ghwose.

35 Wakumbuka ka Imulungu tsa yuyo libambalawe lyawo,

na ka Imulungu Iyali Kuchanya ng'ani yuyo mkombotsi wawo.

36 Lekeni wambugha kwa imilomo yawo,

na kwa milimi yawo wamlongela ughutsu,

37 imimoyo yawo ng'awayikile ghoya baye kuna yeye,

wala lilaghano lyake ng'awalikindise baye.

38 Hata apfo, yeye kawonela libatsi,

kawaleghusila ghamatotso ghawo, ng'awahinyile baye,

lekeni kaghendelela kududumila ukughudubuka kwake,

wala ng'aikoletse imaya yake yose baye.

39 Naye kakumbuka ka wawo wakala wa wanu hela,

weghala na libeho ilibita, wala ng'alikuya keli baye.

40 Wamlemile mala ngapi akula kunyika?

Na wamghela usungu akula kunyika.

41 Nawo woya kuchughu wamghetsa Imulungu,

wamghela usungu Iyelile wa Isiraeli.

42 Wala ng'awaghukumbuke baye ghumoko ghwake,

mna litsuwa hayawakombole kulawa kwa iwanu iwawahinyile,

43 ahala hayonese ipfihulo pfake akula Misiri,

na ahala hayatendile ipfinu pfake pfa ukukangawatsa akula kuna iluwala lwa Soani.

44 Kaghalusa imito yawo iwa damu,

wala ng'awadahile baye ukunwa ghamatsi gha ipfikolongo pfawo.

45 Kawaghalila mghati mwawo wang'onzi wengi iwawadesile,

na wapfibutwa iwawahinyile.

46 Kaweng'a wanzighe imimeya yawo, waja ghamapfuno ghawo,

na wahinya imighunda yawo.

47 Kaihinya imitsabibu yawo kwa imvula ya ghamabwe,

na ihinya mitini yawo kwa ichipfeghetsi.

48 Kawaleka wang'ombe wawo walaghighwe na imvula ya ghamabwe,

na ilumwesa lukoma imifugho yawo.

49 Kaileka imaya yake ng'ulu iwakile,

kawaghudubukila, kawaghela usungu, na kawatenda waghaye,

kuya kawaghalila kingili lya malaika liwadununze.

50 Kaighala mnzila imaya yake,

wala tsiloho tsawo ng'atsileghusile lifwa baye,

ila katsileka tsitowighwe na utamu wa tauni.

51 Kamkoma chila mwana mmale chaudele wa iwanu wa Misiri,

iwana iwoneke mna lihema lya Hamu,

aba tsawo hawang'ali wasongolo.

52 Naye kawalongotsa iwanu wake kulonga ng'olo,

kawalongotsa kunyika ka kingili lya mifugho.

53 Kawalongotsa tseghamba, wala ng'awapfukile chinu baye,

lekeni maaduwi tsawo, ibahali iwaghubikitsa.

54 Kawaghala mbaka kuna isi yake iyelile,

kuna ichidunda chayabokile kwa ghumoko ghwake ghwa kujilo.

55 Kawawinga iwanu wa tsiisi hambele hawo,

na katsighola isi tsawo kwa Waisiraeli,

na kagheka ghamakabila gha Isiraeli ghakale mna ghamahema ghawo.

56 Lekeni wamghetsa na wambiduka Imulungu Yali Kuchanya Ng'ani,

Wala ghamalaghitso ghake ng'awaghatoghole baye.

57 Ila wahunduka kuchughu na watenda ighehile kama iwahenga wawo,

nawo watsenzeuka kulonga upinde uli hela ngupfu.

58 Wamtenda yaghudubuke kwa tsimatsabahu tsawo tsa ukutambikila milungu ingi,

na wamtenda yone gele kwa ipfinyago pfawo.

59 Imulungu hayonile agho kaghudubuka ng'ani,

naye kamlemesa ghendo Isiraeli.

60 Kalileka lihema lya Shilo,

lihema lyatsengile yakale na iwanu.

61 Katsileka tsingupfu tsake,

na utunitso wake ughelighwe mna ghamoko gha maaduwi tsake.

62 Kawalapfa iwanu wake watowighwe na lipanga,

na kawaghudubukila iwanu wake imwenyegho.

63 Ghumoto ghuwalakatsa iwasongolo wawo,

na iwali wawo nng'awambilighwe baye tsiwila tsaukukwelighwa.

64 Iwatambika wawo wakomighwa kwa lipanga,

wala pfitsuka wawo ng'awadomboketse baye.

65 Baho IMNDEWA kalamka kama munu iyalawile mna tsinongo,

kulonga munu iyana tsingupfu pfayotsinduka kulawa mna ukupatika imbwali.

66 Naye kawadimla aduwi tsake woya kuchughu,

kawaghela ichinyala ing'achihupa baye.

67 Kalilema lihema lya Yosefu,

wala likabila lya Efuraimu ng'alisaghule baye.

68 Lekeni kalisaghula likabila lya Yuda,

ichidunda cha Sayuni chayochikunda.

69 Baho katsenga ing'anda ng'ulu ya Imulungu ka chidunda,

kalimisa likale kama idunia pfaikala matsuwa ghose ing'aghomala.

70 Kuya kamsaghula Daudi, imtumighwa wake,

kamlapfa kulawa kuna ipfikwama pfa wang'olo,

71 kulawa kuna ukudima wang'olo kamghala yadime iwanu wake wa Yakobu,

iwanu iwali wake ghendo wa Isiraeli.

72 Naye kawadima kwa ghumoyo ghwake ighunoghile,

na kawalongotsa kwa ukudaha kwa ghamoko ghake.