1 Kabweda imunu ayula iyaleghusighwe ghamatotso ghake,

imunu ayula tsinzambi tsake itsilekelelighwe.

2 Kabweda imunu ayula IMNDEWA ing'ompetela baye ghamatotso ghake,

na mna iloho yake mduhu ughutsu.

3 Hanikalile ng'ana nitsilonge baye tsinzambi tsangu,

imipate yangu ikeng'eneka, kwaapfila ning'ali nilila misi yose.

4 Mana chilo na misi ghumoko ghwako ghunididimitsa,

lijasho lyangu linyala kulonga litungwe mna ghumsimu ghwa chiyangatsi.

5 Kuya nikulongela tsinzambi tsangu,

na sipfisile baye ighehile ghangu,

Nilonga, "Nitsolonga ghamatotso ghangu kwa IMNDEWA,"

naghwe baho kunileghusila tsinzambi tsangu.

6 Apfo, chila munu iyokupfuka yakulombe ghweghwe,

ahala hauli kwabaho,

ghamatsi ighokululusa haghomema,

yeye ng'aghatsompfikila baye.

7 Ghweghwe kwa hanu hangu ha ukwipfisa,

kutsonikinga na ghamaghayo,

na kutsonitsunguluka aku nakwimba tsiwila tsa ukukombolighwa.

8 Imulungu kolonga, "Nene nitsokufunda,

na nitsokulangulitsa inzila ya ukubita,

nitsokushauli, aku inenge yangu yokulolesa.

9 Mleke kuwa kama falasi, au nyumbu,

iwalihela tsimbutsi,

awo kodaha kuwaghoma kwa chibang'wa na mitsabi,

hela ng'awatsokusoghelela baye."

10 Imunu yehile katsodununzika ng'ani,

lekeni ayula iyehuwila IMNDEWA, uluso mkulu utsomtsunguluka.

11 Mumsekelele na mumdeng'elele IMNDEWA,

mwemwe imtenda ighali gha haki,

mwimbe kwa ukukemelela,

mwemwe imli na imimoyo inoghile.