1 Ka apfila mbala pfayakona ng'ilu ukunwa ghamatsi gha ipfikolongo,

pfipfo nene pfanikwonela ng'ilu ghweghwe, Ghwe Imulungu.

2 Iloho yangu yomwonela ng'ilu Imulungu,

Imulungu iyali mgima.

nitsoghenda tsuwachi nikoneke hambele ha Imulungu?

3 Ghamasotsi ghangu ghawa ichijo changu cha nemisi na cha nechilo,

ahala iwanu hawonilonga apfino misi yose,

"Yali kwani Imulungu wako?"

4 Hanipfikitsa ng'ani mmoyo mwangu,

nokumbuka apfila pfanighendile na ghumtingano ghwa iwanu,

na kuwalongotsa kuna ing'anda ya Imulungu,

akuno twodeng'elela na kulonga mighede kwa ukukemelela,

mna ghumtingano mkulu ghwa iwanu iwotenda ichihungo.

5 Nighutsa nimwenyegho, hebali nitsinika apfino?

Heule nikwalangula apfino mmoyo?

Na nene nitsomlolela Imulungu, kwaapfila nitsomtunya yeye keli na keli,

iyali Imulungu wangu na iyonikombola.

6 Ghwe Imulungu wangu, nina hutsuni ng'ani mmoyo mwangu,

apfo nene nitsokukumbuka Ghweghwe,

kulawa muisi ya Yoridani,

na kulawa mpfidando pfa Herimoni,

na kulawa ichidunda cha Mizari.

7 Ghumto ghuna ghamatsi ighaghendese hasi ghokemelela ghumto ghungi,

kwa litsi lya tsimululu tsa ghamatsi ghako ghose ighamemile,

na ghamawimbi ghako ghose ghanibitila mchanya mwangu,

8 Nemisi IMNDEWA konilaghitsila uluso wake,

na nechilo nomwimbila wila,

na nomlomba yeye iyali Imulungu wa ugima wangu.

9 Nitsomlongela Imulungu, iyali Libambalawe lyangu,

"Hebali unisemwile?

Hebali nighendelela kudomboketsa, akuno aduwi tsangu wonidununza?"

10 Imipate yangu yonitama kwa usungu mkulu,

apfila aduwi tsangu pfawoniseka na kunilonga misi yose,

"Yali kwani Imulungu wako?"

11 Nighutsa nimwenyegho, hebali nitsinika apfino?

Heule nikwalangula apfino mmoyo?

Na nene nitsomlolela Imulungu, kwaapfila nitsomtunya yeye keli na keli,

iyali Imulungu wangu na iyonikombola.