1 Ghwe MNDEWA, ghweghwe kwa hanu hetu ha ukukala kwa pfeleko pfose.

2 Tangiya ipfidunda ng'ana pfiwe baho,

wala ng'una uiumbe isi na ipfili mumo,

ghweghwe kwa Mlungu tangiya matsuwa ghose ighabitile,

mbaka matsuwa ghose ighakutsa.

3 Kowoyitsa iwanu kuna litimbwisi, ahala haulonga,

"Mwemwe muwanu, muye kuna litimbwisi."

4 Mana miyaka elufu imwe, hambele ha tsinenge tsako,

yeghala na litsuwa libitile lya digholo, na kama ukuwasilila kwa chilo chimwe.

5 Kowadumlila kutali iwanu, hawowasa fofofo,

nawo weghala ghendo na imitsani imela hamitondo,

6 nemitondo yotula kuya yokula,

na haipfika nemihe yoholola na yonyala.

7 Kwaapfila ghweghwe ung'aghudubuka twetwe tohupa,

na imaya yako yotughudemesa.

8 Ghweghwe kugheka ghamatotso ghetu hambele hako,

na tsinzambi tsetu itsipfisike tsamwatsi mna ghumwanga ghwa uhanga wako.

9 Mana ghamatsuwa ghetu ghose ghobita mna imaya yako,

na imiyaka yetu toimalitsa mna ukughuta.

10 Ghamatsuwa ghetu gha ukukala wagima miyaka sabini,

na ana tuna ngupfu miyaka semanini,

lekeni imiyaka ayo yose imema maghayo na usungu,

nayo yobita himahima, natwe twohupa.

11 Angu ahala haughudubuka iyomanya tsingupfu tsako nani?

Kwaapfila ukulu wa imaya yako welinga na apfila pfatubamighwa tukupfuke.

12 Utufunde ukughapeta ghoya ghamatsuwa ghetu,

ili tudahe kuwa na ghumoyo ghuna ihekima.

13 Ghwe MNDEWA, ubwele! Utsokawa mbaka tsuwachi?

Wonele libatsi iwatumighwa wako.

14 Hamitondo utumemetse uluso wako mkulu,

ili tukwimbile na kukudeng'elela ghweghwe mna ghamatsuwa ghetu ghose.

15 Lelo utwing'e miyaka mingi ya ukudeng'elela ka pfautwing'ile imiyaka mingi

ya ghamaghayo na ukudununzika.

16 Ghamatendo ghako ghoneke kwa iwatumighwa wako,

na iwana wetu uwalanguse ukulu wako.

17 Uluso wa IMNDEWA, Imlungu wetu uwe na twetwe,

na utsimitse ghoya tsisang'ano tsa ghamoko ghetu,

ona, tsisang'ano tsa ghamoko ghetu utsimitse ghoya.