1 Ghwe Imulungu wangu, Imulungu wangu, hebali unilekile?

Hebali ukala kutali, na nene nobama unikombole,

naghwe ng'uhulika baye ukughuta kwangu?

2 Ghwe Imulungu wangu, nolila nemisi,

lekeni ng'unyidika baye,

nolila nechilo, lekeni sikona ng'apfu baye.

3 Lekeni ghweghwe kwela,

yukalila ichighoda cha ufalume,

na yutunyighwa na Waisiraeli.

4 Wahenga wetu tsawehuwila kuna ghweghwe,

tsawehuwila ghweghwe,

naghwe kuwakombola.

5 Tsawakulilila ghweghwe,

nawo wakombolighwa,

wehuwila ghweghwe,

nawo ng'awaghelighwe chinyala baye.

6 Na nene namng'onyo, wala sili munu ghendo baye,

chila munu konikojonga, na iwanu wose wonibetsa ghendo.

7 Wose iwombona nene woniseka,

wonifonza akuno wohighisa ghamatwi ghawo.

8 Wolonga, "Kehuwila IMNDEWA,

leka lelo IMNDEWA yamhonetse,

leka yamkombole, kwaapfila yeye tsakanoghelwa naye."

9 Lekeni ghweghwe yuyo yunilapfile kulawa munda mwa mai wangu,

kunyika mgima ahala hanikalile mna ghamatombo gha mai wangu.

10 Nene nawakwako ghweghwe tangiya hanyoneke,

tangiya hanikalile mna lida lya mai wangu,

ghweghwe kwa Imulungu wangu.

11 Uleke kukala kutali na nene,

kwaapfila maghayo gha habehi,

wala haduhu munu wa ukunyapfila.

12 Maaduwi wengi wanitsunguluka,

wakali ka mbogho,

wanitsingila ka mbogho wa Bashani.

13 Wanyasamila imilomo yawo,

kulonga simba iyodadatsula na iyoduma.

14 Nyitika kama matsi,

imipate yangu yose ihulusuka,

Ghumoyo ghwangu ghuwa kama nta,

ghulumbuka mghati mwangu ghendo.

15 Tsingupfu tsangu tsinyala kama chihali,

na ilulimi lwangu lunanahila mna lipate lya ghamatsino,

naghwe kuniwasitsa mna litimbwisi lya lifwa.

16 Mana mtingano ghwa iwotenda ighehile ghunitsingila,

kulonga wambwa,

wanitsunguluka na waghadeghadegha ghamoko ghangu na ghamaghulu ghangu ka simba.

17 Nene nisoka mbaka mipate yangu yopeteka,

maaduwi tsangu wondola na wonikodolela tsinenge.

18 Wegholela tsinguwo tsangu,

na libwende lyangu wegholela kwa ukwasa simbi.

19 Lelo naghwe, ghwe MNDEWA,

uleke kukala kutali ghweghwe yauli tsingupfu tsangu,

utse hima unyapfile.

20 Uukombole ugima wangu ndeke kulaghighwa na lipanga,

ugima wangu ghendo kulawa mna tsinumba tsa yumbwa.

21 Unilopole kulawa mna ghumlomo ghwa isimba,

ka apfila pfaunikombole kulawa mna tsimembe tsa imbogho.

22 Nitsopeta tsimbuli tsa litaghwa lyako kwa wandughu tsangu,

mghati mwa ghumtingano ghwawo nitsokutunya ghweghwe.

23 Mwemwe yamumpfuka IMNDEWA mtunyeni,

mwemwe iwatsukulu wa Yakobu wose mtunyeni,

mpfukeni mwemwe wose yamli watsukulu wa Isiraeli.

24 Ng'obetsa baye wala si mtalatsi baye mna ukughaya kwa imunu iyoghanzika,

Wala ng'ampfisile ichihanga chake baye,

lekeni hayamlilile yamwapfile kamwidika.

25 Nene nitsokutunya kuna ghumtingano mkulu,

hambele ha awala iwokupfuka,

nene nitsotenda aghala ghanilahile ukutenda.

26 Iwahole watsakuja na kwighuta,

awala iwombama IMNDEWA watsomtunya,

imimoyo yenu naiwe na ugima matsuwa ghose.

27 Iwanu iwali chila ubali kwaitsighila isi watsokumbuka,

na kumhundukila IMNDEWA,

na tsikolo tsose tsa iwanu wali muisi watsokwinamila ghweghwe.

28 Kwaapfila IMNDEWA yuyo mfalume, naye kotawala tsiisi.

29 Matajili wose iwali muisi watsakuja na kumwinamila yeye,

wose iwakufa watsomwinamila yeye,

awala ing'awodaha baye ukwitenda wakale wagima.

30 Iwatsukulu iwakutsa watsomtumikila,

na ipfileko pfitsolongelighwa tsimbuli tsa IMNDEWA.

31 Na iwanu iwatsakoneka hambele watsolongelighwa,

"IMNDEWA yuyo iyawakombole apfino iwanu!"