1 Nitsokutunya ghwe Imulungu wangu na mfalume wangu,

nitsolitunya litaghwa lyako matsuwa ghose ing'aghomala.

2 Matsuwa ghose nitsokutunya,

nitsolitunya litaghwa lyako matsuwa ghose ing'aghomala.

3 IMNDEWA yuyo imkulu iyobamighwa ukutunyighwa,

na ukulu wake ng'udaha kuulinga baye.

4 Iwanu watsotsitunya tsisang'ano tsako kulawa cheleko chimwe mbaka cheleko chingi,

iwanu watsoghalonga ghamatendo ghako makulu.

5 Watsolonga utunitso wako na ukulu wako,

na watsoghapfikitsa ghamatendo ghako gha ukukangawatsa.

6 Iwanu woghalonga ghamatendo ghako makulu gha ukukangawatsa,

na nene nitsoghalonga kwa mlomo ghwangu makulu ghautendile.

7 Watsokutunya kwa uluso wako mkulu,

na watsokutunya kwa ukutogholeka kwako.

8 IMNDEWA kamluso na kana libatsi,

na ng'osumka ukughudubuka baye.

9 IMNDEWA kanogha kwa iwanu wose,

na kokonela libatsi pfinu pfose pfayaumbile.

10 Ghwe IMNDEWA, pfose pfaulumbile pfitsokutunya,

na iwanu wako iwotogholeka nawo watsokubaliki.

11 Watsosima ukulu wa ufalume wako,

na watsoulonga ukulu wako,

12 ili chila munu yamanye ghamatendo ghako makulu pfaghali,

na utunitso wa ufalume wako.

13 Ufalume wako ng'autsigha baye,

naghwe kutsolongotsa matsuwa ghose ing'aghomala.

Ghose ghayolonga IMNDEWA koghatenda,

yeye kamluso mna ghose ghayotenda.

14 IMNDEWA kowapfila wose iwoghaya,

na kowenula wose iwakughwa.

15 Wapfiumbe wose wokulolela ghweghwe,

ahala hawobama ichijo ghweghwe koweng'a.

16 Kwa ghumoko ghwako koweng'a ichijo,

na koweneletsa wose chila chinu chawobama.

17 Chila chinu IMNDEWA kotenda kwa haki,

na kamluso mna ghose ghayotenda.

18 IMNDEWA kahabehi na awala iwomkema,

awala wose iwomlomba kwa ghumoyo ghunoghile.

19 Koweng'a chawobama awala wose iwompfuka,

kohulika ichililo chawo na kowakombola.

20 MNDEWA kowakinga wose iwomkunda,

lekeni awala iwehile wose katsowadumlila kutali.

21 Nitsomtunya IMNDEWA kwa ghumlomo ghwangu,

na pfiumbe pfose watsolitunye litaghwa lyake lyelile matsuwa ghose ing'aghomala.