1 Ghumoyo ghwangu ghumema longa linoghile,

nene nimtungila wila mfalume.

Ilulimi lwangu lwa ikalamu ya imunu iyadahile ukwandika ghoya.

2 Ghweghwe kunogha kubita iwanu wose,

ghumlomo ghwako gholonga uluso uliyeka,

apfo lelo Imulungu kakubaliki matsuwa ghose.

3 Wiyohe lipanga lyako mhatsa,

ghweghwe yuli na tsingupfu,

Yunoghile ng'ani na yuna utunitso,

4 Ukulu wako ughendelele kwenela na uhume,

haudina ifalasi ulanguse tsimbuli itsilongesa, tsauhole, na tsa ihaki,

na ghumoko ghwako ghwa kujilo ghulanguse ghamatendo makulu ighoghuma wogha.

5 Imishale yako inolighwa,

nayo yowahoma maaduwi wa mfalume mna imimoyo yawo,

na iwanu wa tsiisi watsakughwa hasi hambele hako.

6 Ghwe Imulungu, ichighoda cha ufalume wako cha matsuwa ghose,

na ing'weku ya ufalume wako yotenda ighagholoke.

7 Ghweghwe tsakunoghelwa na ighali gha haki,

na ighehile ng'unoghelighwe nagho baye,

apfo lelo Imulungu, Imulungu wako,

kakubaka mapfuta na kakwinula kubita sale tsako.

8 Tsinguwo tsako tsose tsonung'ila utuli, manemane, udi na mdalasini,

Mna ghamang'anda gha chifalume ighahambighwe membe tsa nembo,

naghwe kodeng'elela litsi lya ipfinubi.

9 Mna iwapinga yuwakemile,

wamwenga wawo neghe tsa wafalume,

na kuna ghumoko ghwako ghwa kujilo pinga malikiya iyokwelighwa,

naye kapfala inzahabu ilawile Ofiri.

10 Hulikitsa ghwe mwana pinga,

uwambe lighutwi utegheletse ghoya,

wasemwe iwanu wako na iwali mng'anda mwa baba wako,

11 naye mfalume katsonoghelwa apfila ghweghwe pfaunoghile,

mana yeye yuyo imndewa wako, naghwe umuhulikitse.

12 Na neghe Tiro katsokughalila inzawadi,

na iwanu iwali matajili watseghalaghala kuna ghweghwe.

13 Lola, neghe wa mfalume mng'anda komelemeta!

Ligaoni lyake lifumighwa kwa nyutsi tsa nzahabu.

14 Koghalighwa kwa mfalume akuno kapfala inguo italitsighwe,

sale tsake wali womsindikitsa, nawo wose woghalighwa kuna ghweghwe.

15 Woghalighwa akuno wakwimba na kudeng'elela,

wakwingila kuna ing'anda ya mfalume.

16 Hanu ha sekulu tsenu watsokala iwanenu,

namwe mtsowatenda wawe wakulu mna isi yose.

17 Nitsolitenda litaghwa lyako likumbukighwe mna ipfeleko pfose,

apfo lelo iwanu watsokutunya matsuwa ghose.