1 Ghwe Imulungu, ghweghwe kwa Imulungu wangu,

nitsokubama kwa ghumoyo ghwangu ghwose,

ghumoyo ghwangu ghwokwonela ng'ilu,

na ilukuli lwangu lwokulolela ghweghwe,

nokwonela ng'ilu mna isi isakale na ilalile ilihela matsi.

2 Pfipfo pfanikwonile hanu hako helile,

nitsona tsingupfu tsako na utunitso wako.

3 Mana uluso wako unogha kubita ugima,

na nene nitsokutunya kwa imilomo yangu.

4 Apfo nitsokutunya ghweghwe mna ghamatsuwa ghanikala mgima,

nitsakwinula ghamoko ghangu nilombe kubitila litaghwa lyako.

5 Ghumoyo ghwangu ghwitseghuta ka ndiya pfijo pfinonile,

na ghumlomo ghwangu ghutsokwimbila ghweghwe aku nodeng'elela na notowa lukenze.

6 Haniwasa mchinanda mwangu nene nokukumbuka ghweghwe,

chilo chose nene nokutongelela ghweghwe.

7 Mana ghweghwe yuyo yunyapfila,

mna ichimbeho cha tsimbawa tsako nitsodeng'elela.

8 Nene nimwenyegho nokunanahila ghweghwe,

ghumoko ghwako ghwa kujilo ghonikindilitsa.

9 Lekeni awala iwoubama ugima wangu wanikome,

watsohulumka kuhisi kwawokala iwanu iwafile.

10 Iwanu awo watsokomighwa kwa ghamapanga,

na ng'uli tsawo tsitsakuwa chijo cha wambwa wa kumuhulo.

11 Lekeni mfalume katsomdeng'elela Imulungu,

katseghoda chila munu yatselaha kuna yeye Imulungu,

kwaapfila imilomo ya iwanu waghutsu itsodiwighwa.