1 Ghwe IMNDEWA, ghweghwe kwa Imulungu yuwoyitsila iwanu ighehile,

Ghweghwe kwa Imulungu yuwoyitsila iwanu ighehile ghawatendile, ulawe wilanguse.

2 Wime wima, Ghwe Mlamtsi wa iwanu wose,

uwoyitsile ghehile ghawo iwanu wana ichidandali ka pfaibamighwa.

3 Ghwe MNDEWA, mbaka tsuwachi ghendo?,

Mbaka tsuwachi iwanu wehile watseghoda?

4 Wawo wolonga kwa ukwitamba,

iwanu wehile wolonga kwa ukwighoda.

5 Ghwe MNDEWA, wawo wowahonda iwanu wako,

wowadununza ghendo awala iwali wakwako.

6 Wowakoma pfitsuka, na iwagheni,

na wowakoma iwana iwalihela aba tsawo.

7 Kuya wolonga, "IMNDEWA ng'atsakona baye,

wala Imulungu wa Yakobo ng'atsomanya chinu baye."

8 Mtange mwemwe imlihela tsimbutsi ghendo, imkala mna iwanu,

Angu tsuwachi mtsopata tsimbutsi mwemwe yamli wabotsi?

9 Angu ayula iyahumbile ghamaghutwi ghetu, ng'ohulika baye?

Apfi ayula iyaumbile tsinenge, ng'akona baye?

10 Pfihi iyotsitowa tsiisi, pfihi ng'odaha baye kutsikembela?

Iyowafunda iwanu ukumanya, pfihi imwenyegho ng'omanya baye?

11 IMNDEWA koghamanya ghawopfikitsa iwanu,

nagho si chinu ghendo baye.

12 Kabweda imunu ayula iyomwatsibu,

Ghwe MNDEWA, ayula yumlangulitsa ghamalaghitso ghako,

13 ili mna litsuwa lya ghamaghayo yeye yakale tulu,

mbaka iwehile hawohimbilighwa lipondo.

14 Kwa apfila IMNDEWA ng'atsowaleka baye iwanu wake,

wala ng'atsowasemwa baye awala iwali wakwake.

15 Kwaapfila ghamalamtsi ghatsolapfighwa keli kwa haki,

na wose wana imimoyo inoghile watsoghawinza.

16 Nani yatsakwinuka yeme na nene hanitingana na iwanu iwehile?

Nani yatsonyapfila ahala hanitingana na awala iwotenda ighehile?

17 Tsa kama IMNDEWA ng'anyapfile baye,

nene ning'aghendile kuna isi ya iwanu iwafile.

18 Ahala hanilongile, "Ghumghulu ghwangu ghuteletsa,"

uluso wako mkulu Ghwe MNDEWA, unyimitsa.

19 ahala hanikwalangula ng'ani,

ghweghwe kongaya ndeng'elo na konikanza.

20 Pfihi walamutsi iwotsulumu wodaha kukala hamwe naghwe?

Wawo iwotunga ghamalaghitso ighowadununza iwanu?

21 Welaghana wawakome wana ihaki,

na kulamla waimwaghe idamu ya iwanu iwalihela matotso.

22 Lekeni IMNDEWA nene kawa ingome yangu,

na Imulungu wangu yuyo libambalawe lyangu lya ukwipfisa.

23 Naye kawoyitsila iwenyegho ighehile ghawanitendele,

na kwa ajili ya agho ighehile ghawo kawamalitsa ghendo,

ona IMNDEWA, Imulungu wetu, kawamalitsa ghendo.