1 Ghwe MNDEWA, unikinge,

kwaapfila nene nokutsumila ghweghwe niwe mgima.

2 Nimlongela IMNDEWA, "Ghweghwe kwa Mndewa wangu,

chila chinu chinoghile chilawa kuna ghweghwe,"

3 Na iwanu iwelile iwali muisi, wawo wanoghile,

nene nonoghelwa kukala nawo.

4 Awala iwomleka Imulungu na kuibama imilungu ingi,

ukudununzika kwawo kutsakongetseka,

nene sitsohangila nawo baye mna ukutsilapfa tsinambiko tsawo tsa idamu,

wala kughakema ghamataghwa gha imilungu yawo mna ghumlomo ghwangu.

5 Ghweghwe IMNDEWA yuyo yungaya chila chinu,

ugima wangu wamna ghamoko ghako.

6 Isi yungaile inogha ghendo,

ona, nibokela hanu hanoghile ghendo.

7 Nene nitsomdeng'elela IMNDEWA iyonifunda ghamahala,

hata kuchilo ghumoyo ghwangu ghonilangulisa cha ukutenda.

8 Matsuwa ghose nene nimwika IMNDEWA hambele hangu,

yeye kaubali wangu wa kujilo, sitsohighisika baye.

9 Apfo lelo ghumoyo ghwangu ghosekelela na ukudeng'elela,

na ilukuli lwangu lutsobwihila tulu.

10 Ona! Ghweghwe ng'utsonileka nene baye nikale kutsimu,

wala ng'utsomleka baye imunu wako iyelile yole.

11 Ila kutsonilangulitsa nitsimanye tsinzila itsilongotsa kuna ugima,

na kutsonimemetsa indeng'elo kwa ukuwa kwako habehi na nene,

mana kuna ubali wako wa kujilo kumema ighanoghile ing'aghomala baye.