1 Mwimbileni IMNDEWA wila wa sambi,

mwimbileni IMNDEWA isi yose.

2 Mwimbileni IMNDEWA, mlitunye litaghwa lyake,

mtangatse ukombotsi wake chila haukucha.

3 Wapeteleni iwanu wa tsiisi utunitso wake,

na walongeleni iwanu wose ghamatendo ghake ighokangawatsa,

4 Kwaapfila IMNDEWA kamkulu na wa kutunyighwa ng'ani,

yeye kobamighwa yapfukighwe kubita imilungu yose.

5 Kwaapfila imilungu yose ya iwanu si chinu ghendo baye,

lekeni IMNDEWA yeye iyaumbile lilanga.

6 Ukulu na ukutunitso pfa hambele hake,

tsingupfu na ukunogha pfa mna ing'anda yake iyelile.

7 Mwing'eni IMNDEWA, iwanu wa tsikolo tsose,

mwing'eni IMNDEWA utunitso na tsingupfu.

8 Mwing'eni IMNDEWA utunitso wa litaghwa lyake,

mghale tsinambiko mwingile mna ipfibwalu pfake.

9 Mwinamileni IMNDEWA kwaapfila yeye kela,

mghudeme hambele hake mwe muwanu wa isi yose.

10 Longeni kuna iwanu wa tsiisi, "IMNDEWA yuyo iyotawala.

isi kaimisa ghoya nayo ng'aihighisika baye.

Katsowahigha iwanu kwa haki."

11 Leka kulanga kudeng'elele, na isi nayo ideng'e,

leka ibahali idume hamwe na pfose pfili mghati mwake.

12 Imighunda na ideng'elele, na pfose ipfili mmighunda.

nayo imibiki yose ya kumhulo itsakwimba kwa ukudeng'elela,

13 hambele ha IMNDEWA, iyakutsa, ona kakutsa yaighige isi.

Katsotsihigha tsiisi kwa haki ghendo,

na kwa ukutogheleka kwake katsowahigha iwanu wa tsiisi.