1 Iwanu wokubeta ghweghwe wakutunye ako Sayuni,

kuna ghweghwe tsinatsili tsetu tutsotsilapfa.

2 Gweghwe yuhulika ukulomba,

iwanu wose watsokutsila ghweghwe.

3 Tsinzambi hatsiwile mtsigho mkulu kuna twetwe,

ghweghwe kutsileghusa tsinzambi atso.

4 Kamota ng'ani imunu ayula yumsaghula ghweghwe,

na ayula yumseghetsa habehi, yakale hana ipfibwalu pfako,

na twetwe twitseghuta aghala ighanoghile gha ing'anda yako,

ighali hanu helile ha ing'anda yako.

5 Kwa makulu ghaututendele ighoghuma wogha,

ghweghwe kutwidika na kutukombola,

chila chiumbe ichili mna isi yose,

na ichili mna ibahali ili kutali, pfose pfokulolela ghweghwe.

6 Ghweghwe yuumbile ipfidunda kwa tsingupfu tsako,

aku ghumwenyegho kwipfatsa tsingupfu.

7 Yutenda ibahali ikale tulu,

na ghamawimbi ghake ghenyamale,

na yumalitsa ghamtsogho gha iwanu.

8 Iwanu iwokala kutali ghendo wokangawala,

kwa aghala makulu ghautendile ighoghuma wogha,

ghweghwe kowatenda iwanu wose wadeng'elele,

kwanzila akula kwalilawila litsuwa mbaka kwalikuswela.

9 Ghweghwe koyangila isi na koighalila imvula,

kotenda lidongo liwe na mnyeke na limele ipfijo,

na ipfikolongo pfako pfimema ghamatsi,

ili iwanu wako wapfune ipfijo,

apfi pfipfo pfautendile isi.

10 Koghamwaghila ghamatuta ghake matsi mengi,

hanu henuke ghweghwe kohabughula hawe chiwala,

kolitenda lidongo liwe na mnyeke kwa mawagha gha imvula,

na koitenda imimeya yake itsuke.

11 Ghumwaka ghose ghumema tsibalaka tsako,

na haubita ghweghwe kolaghatsa ipfinonile.

12 Pfolaghalila kuna ghumghina ghwa kunyika,

na ipfidunda pfodeng'elela.

13 Kuna ghumghina kumema wanyama,

ipfiwala pfimema ghamapfuno,

chila chinu chili mumo chakwimba na ukudeng'elela.