Salmos 43

Ukulomba kwa imunu iyali kuna isi ya utumwa koghendelela

1 Ghwe Imulungu unilamlile na unyamile,

unihighile lighomba lyangu hambele ha iwanu wa isi ing’aimpfuka Imulungu baye,

unikombole kulawa kwa iwanu waghutsu na iwehile.

2 Kwapfila ghweghwe yuyo Imulungu yanikutsumila.

Hebali unilemile?

Hebali nighendelele kudomboketsa,

akuno aduwi tsangu wonidununza?

3 Nighalile ghumwanga ghwako na ukulongesa kwako

pfitse pfinilongotse,

na pfinighale mbaka kuna ichidunda chako chelile,

mbaka hanu haukala.

4 Kuya nene nitsoghenda kuna imatsabahu ya Imulungu,

kuna ghweghwe Imulungu yanikudeng’elela na yanikusekelela,

na nitsokutowela chinubi na kukutunya ghweghwe Imulungu, yauli Imulungu wangu.

5 Nighutsa nimwenyegho, hebali nitsinika apfino?

Heule nikwalangula apfino mmoyo?

Na nene nitsomlolela Imulungu, kwaapfila nitsomtunya yeye keli na keli,

iyali Imulungu wangu na iyonikombola.