1 Leka nene nimtunye IMNDEWA,

Ghwe IMNDEWA Mlungu wangu, kwa mkulu ng'ani,

kwipfalitsa ukulu na itunitso.

2 Kwighubika ghumwanga ka bwende,

kogholosa kulanga ka lihema,

3 na kwika tsingutso tsa ligholofa lyako mchanya mwa ghamatsi,

yutenda ghamabingu kuwa mtuka ghwako ghwa ing'ondo,

na koghuluka mchanya mwa ghamabawa gha libeho.

4 Yeye kowatenda wamalaika wake wawe beho,

na iwatumighwa wake wawe lambi lya ghumoto.

5 Kayimisa isi ime ghoya mna imisingi yake,

ili ileke kuhighisika ghendo matsuwa ghose ing'aghohupa.

6 Ghweghwe kuighubika isi kwa ibahali kulonga bwende,

nagho ghamatsi ghaghubika ghendo ipfidunda pfose.

7 Ghweghwe kughakembela ghamatsi nagho ghatsuma,

naghwe haudumile kulanga, ghasumka ghoka,

8 ghadina ipfidunda, ghahulumka kuna ghamabonde,

mbaka hanu ahala haubamile ghakale.

9 Naghwe kwika ghumbaka ghaleke kughuloka,

ghaleke kuya keli kuighubika isi.

10 Ghweghwe yuyo yutenda tsimbwibwi tsilawe mna ghamakonde,

na tsibite haghati ha ipfidunda.

11 Atso tsoweng'a ghamatsi gha ukung'wa iwanyama wa kwibagho,

na tsomalitsa tsing'ilu tsa wapfihongwe wa kumhulo.

12 Wapfideghe wa kulanga wotsenga ipfibali pfawo,

na wakwimba wila mna ghamaputila gha imibiki.

13 Ghweghwe koitowela imvula ipfidunda kulawa kuchanya kulanga,

nayo isi yomema ipfinu pfinoghile pfaumbile.

14 Kotenda libagho lyote liwe mghina ghwa ukuja iwanyama,

na imimeya yawohanda iwanu wapate ichijo,

15 na idipfai isangalamsa ghumoyo ghwa iwanu,

ghamapfuta gha ukubakala ipfihanga pfidedemke,

na chighate ichiwanoghelesa iwanu imimoyo.

16 Imibiki ya IMNDEWA, yobokela mvula nyingi,

ona, imikataluba ya Lebanoni yauihandile.

17 Amwo wapfideghe wotsenga ipfibali pfawo,

na ikolongo kakwika ikaye yake mna imisonobali.

18 Kuna ipfidunda pfitali kuko kwawali wamene wa kumhulo,

na tsilwatu tsa ghamabambalawe mumo wabalaghaja mwawotsumila.

19 Kaghuumba ghumwetsi ghwonese imisimu,

na litsuwa lyomanya pfalitsakuswa.

20 Koghala ichisi, ichilo chakwingila,

baho chila mnyama wa kumhulo kolawa kakwanga,

21 iwana wa isimba woduma wobama waghoghe mnyama wa ukuja,

na wobama ichijo chawo kulawa kwa Imulungu.

22 Litsuwa halilawa, wakuya mna tsimango tsawo wowasa.

23 Baho naye imunu koghenda kuna ing'onde yake,

na kuna isang'ano yake mbaka hamihe.

24 Lola, pfatsili nyingi tsisang'ano tsako, Ghwe MNDEWA,

ghose kughatenda kwa hekima, isi imema ipfiumbe pfako.

25 Ibahali ya akula, ng'ulu na ipfika kutali,

imema pfiumbe ing'apfidahika baye ukupetighwa,

ipfiumbe pfina ugima, pfidodo na pfikulu.

26 Amwo mna tsimeli tsakwanga,

na Lewiyatani, yumuumbile yadawale mmo.

27 Awo wose wokubeta ghweghwe uweng'e ichijo chawo hawochibama.

28 Hauweng'a, wawo wochika hamwe,

haupfumbula ghumoko ghwako wawo weghuta ighanoghile.

29 Haupfisa uhanga wako, wawo wakwingila wogha,

haulapfa iloho yawo, wawo wakufwa,

nawo wakuya mna litimbwisi lyawo.

30 Haughala iloho yako, wawo woumbighwa,

naghwe koutenda uhanga wa isi uwe wasambi.

31 Utunitso wa IMNDEWA na ukale matsuwa ghose ing'aghomala,

IMNDEWA yatsideng'elele tsisang'ano tsake.

32 Yeye koilolesa isi nayo yodedema,

kopfidonza ipfidunda napfo pfodusuka liyosi.

33 Nitsomwimbila IMNDEWA mna ghamatsuwa gha ugima wangu,

nitsakwimba wila tsa ukumtunya Imlungu wangu matsuwa ghose hanikala mgima.

34 Ukutongelela kwangu nakumnoghele yeye,

nene nomdeng'elela IMNDEWA.

35 Iwotenda tsinzambi wahupe muisi,

na iwehile waleke kuwa baho keli.

leka nene nimtunye IMNDEWA! Mtunye IMNDEWA.