1 Utegheletse, Ghwe Mdimi wa Isiraeli,

ghweghwe yumlongotsa Yosefu ka kingili lya ng'olo,

ghweghwe yukala mchanya mwa iwapfiumbe wana ghamabawa iwakemighwe makelubi, ulangatse,

2 hambele ha Efuraimu, na Benjamini, na Manase,

utsilamse tsingupfu tsako utse utukombole.

3 Ghwe Mulungu, utubweletse,

utumwemwesele ichihanga chako, na twetwe tutsokomboka.

4 Ghwe MNDEWA, Imulungu wa ghamakingili,

kutsoghudubukila ukulomba kwa iwanu wako mbaka tsuwachi?

5 Ghweghwe kuweng'a ghamatsosi ghawe ichijo chawo,

kuwanwesa ghamasotsi ighamemile mna libakuli.

6 Ghweghwe kututenda tubetsighwe na iwanu iwali habehi na twetwe,

na aduwi tsetu wotuseka.

7 Ghwe Imulungu wa tsingupfu tsose,

utulangatsile ichihanga chako ili tukombolighwe.

8 Twetwe twighala na ghumbiki ghwa mnzabibu,

yautulapfile kuna isi ya Misiri,

na kuwawinga iwanu wa isi tsingi,

na kughuhanda mna tsiisi atso.

9 Kughuhalila ghukule ghoya,

naghwo ghwota mitsitsi na ghwenela mna isi yose.

10 Ipfidunda pfighubikighwa na ichimbeho chake,

na ghamaputila ghake ghaghubika imibiki mikulu ya imikataluba.

11 Naghwo ghwenetsa ghamaputila ghake mbaka kuna ibahali,

na ipfitumba pfake mbaka kuna ghumto.

12 Hebali lelo ubomole imibanda yake,

mbaka awala wose iwobita mnzila wobawa ghamatunda ghake?

13 Wangubi wa kubagho woghuhinya, na ipfiumbe pfa kunyika pfoghuja.

14 Ghwe Imulungu yuna tsingupfu, hunduka uye,

ulolese kulawa kulanga wone, na ughulolese ghumnzabibu aghuno,

15 ghwaughughombeke ghumwenyegho kwa ghumoko ghwako ghwa kujilo,

agho ghugho imwana yumtendile ghumwenyegho yawe na ngupfu.

16 Ghumzabibu ghwako ghukanighwa na ghulakatsighwa na ghumoto,

haughudubuka na kuwakembela wawo wohupa.

17 Ghumoko ghwako ghumkinge imunu ayula iyokala ubali wako wa kujilo,

imwana yumsaghule yawe wako ghumwenyegho.

18 Na twetwe ng'atutsokuleka baye.

utwing'e ugima, na twetwe tutsolitunya litaghwa lyako.

19 Ghwe MNDEWA, Imulungu yuna tsingupfu,

utulangatsile ichihanga chako, natwe tukombolighwe.