1 Ghwe Imulungu, kutwasa, kwaapfila kutughudubukila

na kutuleka tutowighwe, apfo lelo utuyitse kuna ghweghwe!

2 Kuitenda isi idedeme na kuighola,

udiwe tsilwatu tsake iwe ngima keli, kwaapfila yodedema.

3 Kuwatenda iwanu wako wone ghamaghayo,

twotsenzeuka ka wanu iwanwile imbwali.

4 Kuwenulila ibendela iwanu awala iwokupfuka ghweghwe,

ili wetinganileghe aho hawohepa imishale kung'ondo.

5 Utukombole na utwapfile kwa ghumoko ghwako ghwa kujilo.

ili iwanu yuwakunda wakombolighwe.

6 Imulungu kalonga kulawa hanu helile,

"Nitsoighola Shekemu aku nodeng'elela,

na nitsowagholela iwanu wangu ichiwala cha Sukoti.

7 Isi ya Gileadi ya kwangu, na isi ya Manase pfipfila ya kwangu,

na isi ya Efuraimu yiyo ikofia yangu ya chuma,

na isi ya Yuda yiyo ing'weku yangu ya ukutawala.

8 Isi ya Moabu yiyo inongo yangu ya ukunawila.

nitsakwasa imikwabatsa yangu mna isi ya Edomu, iwe chitango ka yangu nene,

na nene nitsokemelela ka niihuma isi ya Ufilisti."

9 Angu nani yatsonighala mbaka kuna ghumji ghutsungulusighwe ubanda?

Nani yatsonilongotsa mbaka Edomu?

10 Pfihi si ghweghwe baye Imulungu, yutwasile?

Na sambi ng'ughenda hamwe baye na maasikali wetu?

11 Utse utwapfile tuwatowe maaduwi tsetu,

kwaapfila ukwapfighwa na imunu si chinu ghendo baye.

12 Tung'awa hamwe na Imlungu tutsotenda makulu,

naye katsowabajugha maaduwi tsetu.