1 Ghwe Imulungu, ghumoyo ghwangu ghwa ghoya ghendo,

nitsakwimba, nitsokutunya ghweghwe yauli utunitso wangu.

2 Lamka, ghwe chinanda na ichinubi,

na nene nitsoilamsa nemitondo tondo.

3 Nitsokulongela mighede Ghwe MNDEWA mghati mwa iwanu,

nitsokutunya ghweghwe kuna iwanu wa tsiisi,

4 Uluso wako mkulu wopfika mbaka kulanga,

na ukutogholeka kwako kopfika mbaka kuna libingu.

5 Winulighwe ako kuchanya kulanga, Ghwe Imulungu,

na utunitso wako wenele muisi yose,

6 utukombole kwa ghumoko ghwako ghwa kujilo, na utwapfile

ili iwanu wako yuwakunda wakombolighwe.

7 Imulungu kalonga kulawa hanu helile,

"Nitsoighola Shekemu kwa ukuhuma,

na nitsolinga ichiwala cha Sukoti.

8 Isi ya Gileadi ya kwangu, na isi ya Manase pfipfila ya kwangu,

na isi ya Efuraimu yiyo ikofia yangu ya chuma,

na isi ya Yuda yiyo ing'weku yangu ya ukutawala.

9 Isi ya Moabu yiyo inongo yangu ya ukunawila.

nitsakwasa imikwabatsa yangu mna isi ya Edomu, iwe chitango ka yangu nene,

na nene nitsokemelela ka niihuma isi ya Ufilisti."

10 Angu nani yatsonighala mbaka kuna ghumji ghutsungulusighwe ubanda?

Nani yatsonighala mbaka Edomu?

11 Pfihi si ghweghwe baye, Imulungu yutwasile?

Na sambi ng'ughenda hamwe baye na maasikali wetu baye,

12 Utse utwapfile tuwatowe maaduwim tsetu,

kwaapfila ukwapfilighwa na imunu si chinu baye.

13 Tung'awa hamwe na Imulungu tutsotenda makulu,

naye katsowabajugha maaduwi tsetu.