1 Ghwe Imulungu yanikutunya,

uleke kwinyamala tulu ghendo,

2 kwaapfila imunu yehile na imunu iyobugha wanyasamila imilomo yawo,

na wonilonga tsimbuli tsa ughutsu,

3 Wonitsunguluka aku wonilonga pfihile,

nawo wetowa hela na nene.

4 Hata ka tsaniwakunda wawo wonitendela maghomba,

na nene nowalombela,

5 Nene tsanimtendela ighanoghile, lekeni yeye koniliha ighehile,

nene tsanimkunda lekeni yeye konyihila.

6 Apfo mlaghitse munu yehile yampinge,

na munu iyana lighomba naye yeme kuna ghumoko ghwake ghwa kujilo.

7 hayohighighwa yoneke katotsa,

na achila chayalombile choneke nzambi.

8 Ghamatsuwa ghake ghahunguke ghawe chidogho,

na ulongotsi wake usolighwe na munu yungi.

9 Iwanaghe wawe wachuwa, na imwehe wake yawe chitsuka.

10 Iwanaghe wangewange akuno wolombalomba,

kutali ghendo na ghamahame ghawo.

11 Imunu iyomdai yasole ipfinu pfose pfayali napfo,

na iwagheni wamboke tsimali tsake.

12 Kuleke kuwa na munu wa kumtendela ighanoghile,

wala munu wa kuwonela libatsi iwanaghe iyawalekile wachuwa.

13 Lweleko lwake luhupe ghendo,

na litaghwa lyawo libaghusighwe mna ilweleko ilukutsa.

14 IMNDEWA yaghakumbuke ighehile ghawatendile iwahenga wake,

na inzambi ya mamo wake ileke kuleghusighwa ghendo.

15 Tsinzambi tsawo tsighendelele kuwa hambele ha IMNDEWA,

nawo wasemwighwe ghendo muisi,

16 kwa apfila ng'akumbuke ukutenda ighanoghile baye,

naye kawadununza mbaka wafa,

iwahingwa, iwalihela chinu na iwaghanzike ghumoyo.

17 Yeye tsakakunda ukuwalighita iwanu,

nagho ghamalighito ghampata yeye mwenyegho,

ng'awabaliki iwanu baye,

na yeye mwenyegho ng'abalikighwe baye.

18 Kuna yeye ukulighita, kuwa ka apfila ukupfala lighwanda,

leka ghamalighito ghampfulumse kama matsi,

na ghamwingile mghati ka apfila ghamapfuta pfaghakwingila mna imipate.

19 Na ghamalighito agho ghawe kama ligwanda lyayopfala,

ghawe ka msipi ghwayopfala mchuno.

20 IMNDEWA yawalihe agho awala iwonighalila ghamaghomba,

na awala iwonilonga pfihile.

21 Lekeni Ghwe MNDEWA, Mndewa wangu,

unitendele ighanoghile ili litaghwa lyako litunyighwe,

unikombole kwaapfila uluso wako unogha!

22 Nene namhingwa, na nahela chinu,

na nilaghika mbaka mghati mwa ghumoyo ghwangu.

23 Nohupa kulonga ichimbeho cha nemihe,

nighulusisighwa kama apfila iwanzighe.

24 Ghamagoti ghangu ghaleghela kwa ajili ya ukufunga,

nene nisoka na ikalile mipate na ingotsi iliyeka.

25 Mbaka nene niwa chihulo kuna wawo,

hawombona wohighisa ghamatwi ghawo.

26 Lelo nyapfile Ghwe MNDEWA, Imulungu wangu,

unikombole kwa ukulola uluso wako pfauli.

27 Walanguse wamanye ka aino sang'ano ya ghumoko ghwako,

ghweghwe ghwe MNDEWA, yuyo yughatendile aghano.

28 Wawo wodaha ukulighita, lekeni ghweghwe kobariki,

wawo wenuka na waghelighwa chinyala,

lekeni nene imtumghwa wako nitsodeng'elela.

29 Waleke wanighalile maghomba wone ichinyala,

na ichinyala chawo chiwaghubike ka ghwanda.

30 Nene nitsomlongela IMNDEWA mighede kwa ghumlomo ghwangu,

na nitsomtunya kuna ghumtingano ghwa iwanu wengi,

31 kwa apfila yeye kakwima kuna ghumoko ghwa kujilo ghwa iyalihela chinu,

yamkombole kulawa kwa awala iwomhigha.