1 Nomkunda IMNDEWA,

kwaapfila yeye kanihulika,

kahulika litsi lyangu na ukulomba kwangu.

2 Kwaapfila lighutwi lyake lyonitegheletsa,

nitsomlomba matsuwa ghose ghanikala mgima.

3 Mitsabi ya lifwa iniboteletsa,

na usungu wa kutsimu unitsila,

ukughaya na ukughanzika kunitsila.

4 Kuya nilikema litaghwa lya IMNDEWA,

"Ghwe IMNDEWA, nikombole."

5 IMNDEWA kamluso na kana haki,

Imulungu wetu kamema libatsi.

6 IMNDEWA kowakinga iwanu iwali nyondenyonde,

hanighanzike, yeye kanikombola.

7 Leka nilongele nimwenyegho, "Uya hanu hako ha ukubwihila

kwaapfila IMNDEWA kakutendela uluso."

8 Mana ghweghwe IMNDEWA, kuukombola ugima wangu na lifwa,

tsinenge tsangu na ghamasotsi,

na kughutenda ghumghulu ghwangu ghuleke ukwikwala.

9 Na nene nitsakwanga hambele ha IMNDEWA,

kuna tsiisi tsa iwanu iwali wagima.

10 Ng'endelela ukutoghola mbaka ahala hanilongile,

"Namna ghamaghayo!"

11 Na haning'ali mna ghamaghayo nilonga,

"Chila munu mghutsu."

12 Angu nitsomuyitsila choni IMNDEWA,

kwa uluso wake wose iyanitendele?

13 Nitsakwinula ichikombe cha ukombotsi,

na kulikemelela litaghwa lya IMNDEWA.

14 Nitsoliha tsinatsili tsanilahile kwa IMNDEWA,

hambele ha iwanu wake wose.

15 Ukufa kwa iwanu wana ihaki chinu chikulu ghendo hambele ha IMNDEWA.

16 Nokulomba ghweghwe, Ghwe MNDEWA,

kwaapfila nene na mtumighwa wako,

mtumighwa wako iyali mwana wa mtumighwa wako pinga,

ghweghwe kunidohola tsipingu tsangu.

17 Nitsokulapfila nambiko tsa ukulakatsighwa tsa mighede,

na kulikema litaghwa lya IMNDEWA.

18 Nitsoliha tsinatsili tsanilahile kwa IMNDEWA,

hambele ha iwanu wake wose,

19 kuna ipfibwalu pfa ing'anda ya IMNDEWA,

mghati mwako, Ghwe Yerusalemu. Mtunyeni IMNDEWA!