1 Nitsakwimba uluso wa lilaghano lya IMNDEWA matsuwa ghose ing'aghomala,

kwa ghumlomo ghwangu nitsotangatsa apfila ghweghwe pfautogholeka mna ipfeleko pfose.

2 Kwaapfila nilonga, "Uluso wako mkulu utsakwima matsuwa ghose ing'aghohupa,

hata kulanga kwenyegho komanya ka ghweghwe kotogholeka.

3 Nyika laghano na ayula yanimsaghule,

nilaha kwa Daudi, imtumighwa wangu.

4 Ipfeleko pfako nitsopfitenda pfikale matsuwa ghose ing'aghohupa,

na ichighoda cha ufalume wako nitsochitenda chime ghoya mna ipfeleko pfose."

5 Na lilanga litsotunya ipfihulo pfako, Ghwe MNDEWA,

na ghumtingano ghwa iwanu iwelile nagho ghutsakwimba apfila pfautogholeka.

6 Angu kulanga tsa kuna nani iyeghala na IMNDEWA,?

Yuhi iyeghala na IMNDEWA mna pfiumbe iwali kulanga?

7 Imulungu kopfukughwa ng'ani mna libalatsa lya iwelile,

yeye ka wa ukupfukighwa kubita wose iwomtsunguluka.

8 Ghwe MNDEWA, Imulungu yuna tsingupfu,

nani yana tsingupfu kama ghweghwe?

Ghwe MNDEWA, na ukutogholeka kwako kwokutsunguluka.

9 Ghweghwe kotawala ahala ibahali haitikuka,

ghamawimbi ghake haghakwinuka, ghweghwe koghahotsa.

10 Ghweghwe kulihonda litsoka likemighwe Rahabu na kulikoma kama imunu iyasubutulighwe,

kwa ghumoko ghwako ghuna tsingupfu kuwapwililisa maaduwi tsako.

11 Kulanga kwako ghweghwe, lidongo pfipfila lya kwako ghweghwe,

isi na pfose ipfimumo kupfiumba ghweghwe.

12 Kaskazini na kusini kutsiumba ghweghwe.

Tabori na Herimoni wodeng'elela litaghwa lyako.

13 Ghweghwe kuna ghumoko ghuna tsingupfu,

ghumoko ghwako ghuna uwetso, ghumoko ghwako ghwa kujilo ghwinulighwa.

14 Ichighoda cha ufalume wako chohigha kwa haki na ukulamla ghoya,

uluso wako mkulu na ukutogholeka pfitsolongola hambele hako.

15 Ghwe MNDEWA, wabweda iwanu awala iwadahile ukwimba na kutowa lukenze,

iwakwanga mna ghumwanga ighukwoneka haukala ghweghwe.

16 Wolideng'elela litaghwa lyako misi yose,

nawo wakwinuligwa mna ihaki yako.

17 Kwaapfila wawo weghodela ghweghwe,

kwa uluso wako tsingupfu tsawo tsakongetseka.

18 Ghweghwe IMNDEWA yuyo yutukinga,

na imfalume wetu kakuna Yeye Iyelile wa Isiraeli.

19 Kuya kulonga mna ghamaono,

kuwalongela iwatumighwa wako iwotogholeka

ka nimwapfila imunu iyana tsingupfu,

nimwinula imunu iyasaghulighwe kulawa mna iwanu.

20 Nimwona Daudi, imtumighwa wangu,

nimbaka ghamapfuta ghangu ighelile.

21 Ghumoko ghwangu ghutsomkindilitsa matsuwa ghose,

na ghumoko ghwangu ghutsomghela ingupfu.

22 Aduwi ng'atsodaha kumbugha baye,

wala iwanu iwehile ng'awatsodaha baye kumdununza.

23 Lekeni nene nitsowahonda ghendo maaduwi tsake hambele hake,

na awala iwomwihila nitsowatowa.

24 Nene nitsakuwa munu wa kutogholeka na mluso kuna yeye,

na kwa lilaghano lyangu katsohuma ng'ani.

25 Na nene nitsakwika ghumoko ghwake mchanya mwa ibahali,

na ghumoko ghwake ghwa kujilo mchanya mwa imito.

26 Naye katsonikema, "Ghweghwe kwa Aba wangu,

Mlungu wangu, na bambalawe ilinikombola."

27 Na nene nitsomtenda yawe mwana chaudele wangu,

yawe mkulu ng'ani kubita iwafalume wa isi yose.

28 Nene nitsomtendela uluso matsuwa ghose,

na lilaghano lyangu kuna yeye litsakwima ghoya.

29 Ipfeleko pfake nitsopfika pfikale matsuwa ghose ing'aghohupa,

na ichighoda chake cha ufalume chitsoghendelela ukukala matsuwa mengi kama lilanga.

30 Na kama iwanaghe watsoleka ukukinda imiko yangu,

na kuleka ukwanga mna ghamalamtsi ghangu,

31 Wang'aleka kutegheletsa ghamalaghitso ghangu,

na kuleka kukinda tsiamri tsangu,

32 nene nitsoweng'a atsabu kwa ghamatotso ghawo kwa kuwafapula na tsimbalati,

na nitsowaghalila matamu kwa tsinzambi tsawo.

33 Lekeni nene sitsoleka baye kumtendela uluso Daudi,

wala sitsoleka ukutogholeka kwangu kuwe ughutsu bayer.

34 Sitsolibiduka baye lilaghano lyangu na yeye,

wala sitsoleka ukumtendela achila chanilongile.

35 Mna ukwela kwangu nilaha mala lumwe,

Daudi sitsomghutsukila chinu baye.

36 Ipfeleko pfake pfitsokalagha matsuwa ghose ing'aghohupa,

na ichighoda chake cha ufalume chitsakuwa kama litsuwa hambele hangu.

37 Chitsakwima kama ghumwetsi matsuwa ghose ing'aghohupa,

na mkalangama iyotogholeka mna ghamabingu.

38 Lekeni ghweghwe kumlema na kumbetsa,

kumghudubukila imunu wako yumbakile ghamapfuta.

39 Kulibela lilaghano lyawikile na imtumighwa wako,

litaji lyake kulitenda lihe kwa ukulyasa mna lidongo.

40 Imibanda yose ya ghumji ghwake kuibomola,

na tsingome tsake tsose kutsibena kutsitenda mahame.

41 Wose iwobita mnzila wamboka tsimali tsake,

naye kawa munu wa kusekighwa na awala iwomtsunguluka.

42 Ghweghwe kughwinula ghumoko ghwa kujilo ghwa awala iwomwihila,

kuwatenda maaduwi tsake wose wadeng'elele.

43 Pfipfila kutenda lipanga lyake liwe dughi,

na ng'umtendile yahume baye kuna ing'ondo.

44 Kuumalitsa ukulu wake,

na ichighoda chake cha ufalume kuchighwisa hasi.

45 Ghamatsuwa gha usongolo wake kughahungutsa,

na kumghela chinyala.

46 Ghwe MNDEWA kwitsepfisa mbaka tsuwachi?

Kwitsepfisa matsuwa ghose ing'aghohupa?

Imaya yako itsakwaka kama ghumoto?

47 Ukumbuke imiyaka ya ugima wangu pfaili midodo,

iwanu si chinu ghendo baye, imane uwaumbile choni!

48 Munu wachi iyodaha kukala mgima yaleke ukufa?

Yuhi iyodaha kuukombola ugima wake na tsingupfu tsa kutsimu?

49 Ghwe IMNDEWA uli kwani uluso wako mkulu wa mwanduso,

waumlahile Daudi kwa ukutogholeka kwako?

50 Ghwe IMNDEWA umkumbuke imtumighwa wako pfayolighighwa,

na apfila pfanidudumila ahala iwanu wose hawoninanga,

51 ghamaligho ghawalighile maaduwi tsako, Ghwe MNDEWA,

hawamnangile imbakighwa mapfuta wako chila hayobita.

52 Utunyighwe, Ghwe MNDEWA, matsuwa ghose ing'aghomala. Ona, pfipfo ghendo!.