1 Ghwe IMNDEWA kunipelemba,

na kunimanya.

2 Kohamanya hanikala na hanikwinuka,

hata ning'awa kutali,

kochimanya achila chanipfikitsa.

3 Konimanya nene hanighenda au hanibwihila,

ghweghwe komanya sang'ano tsangu tsose.

4 Sina nonge chinu baye,

ghweghwe komanya chanibama ukulonga.

5 Ghweghwe kunitsingila chila ubali,

konyikila ghumoko ghwako mchanya mwangu ghunikinge.

6 Tsimbutsi tsako tsonikangawatsa,

aghano makulu ng'ani,

na nene sidaha baye ukughamanya.

7 Nitsumila kwani niihepe iloho yako?

Nitsumila kwani hanu ghweghwe ng'auli baho baye?

8 Ning'aghenda kulanga,

ghweghwe kwakuko,

ning'aghenda kutsimu ghweghwe kwakuko.

9 Hata ning'aghuluka mbaka kwalilawila litsuwa,

au kumwambu mwa ibahali,

10 ako kose kwa kuko konilongotsa,

na ghumoko ghwako ghwa kujilo ghunikindilitsa.

11 Ka ning'alonga ichisi chinipfise,

na ghumwanga ghung'awile chilo ghunitsunguluke nene,

12 kuna ghweghwe ichisi ng'achitsakuwa baho baye,

chilo chitsakuwa ka nemisi,

kwaapfila ichisi kuna ghweghwe ka mwanga.

13 Ghweghwe kuniumba pfiungo pfangu pfa mghati,

na nibasa hamwe lida lya mai wangu.

14 Nitsolonga mighede kwaapfila niumbighwa kwa ukukangawatsa na kwa ukupfukighwa,

ghamatendo ghako ghokangawatsa,

na nene konimanya ghendo.

15 Imipate yangu ng'aipfisike baye kuna ghweghwe,

ahala haniumbighwe kwa chinyele nyele mna isi

ahala hanikalie nibasa mghati mwa isi.

16 Ghweghwe tsakumbona ng'ana nene nyoneke baye,

ghamatsuwa ghangu ghaunikile,

ghose tsaghandikighwa mna ichitabu chako,

hata ng'ana litsuwa limwe lyanze baye.

17 Ghwe Imulungu, ghaukwalangula kuna nene makulu,

na ng'aghodaha ukupeteka baye.

18 Ning'aghapetile ghang'awile mengi kubita ghumsanga,

na hanilamka ning'ali na hamwe na ghweghwe.

19 Ghwe Imulungu, nene chanibama ghendo ung'awakomile iwanu wehile,

na iwanu iwokoma wayao wakale kutali na nene.

20 Wawo wokulonga pfihile,

na maaduwi tsako wolilonga pfihile litaghwa lyako.

21 Ghwe IMNDEWA, angu niwehile awala iwokuhila ghweghwe?

Apfi niwabetse awala iwokulema ghweghwe?

22 Iwokuhila ghweghwe, na nene nowohila ghendo.

wawo wawa maaduwi tsangu

23 Ghwe Imulungu, unipelembe ughumanye ghumoyo ghwangu,

unighetse ughamanye ghanipfikitsa.

24 Undole ka mna ghumoyo ghwangu mna ghehile,

na unilongotse mna inzila ya matsuwa ghose ing'aghomala.