1 Ghwe IMNDEWA, utegheletse ukulomba kwangu,

utegheletse chililo changu umbonele libatsi,

unyidike kwaapfila ghweghwe kotogholeka.

2 Uleke kunihigha nene mtumighwa wako,

kwaapfila kuduhu munu iyali mgima iyana ihaki hambele hako.

3 Maaduwi waniwinzilitsa,

wanighwisa hasi,

na wanyika mchisi ka iwanu iwafile ghumwande.

4 Iloho yangu itsilika,

na ghumoyo ghwangu ghutenyuka ghendo.

5 Noghakumbuka ghamatsuwa ighapfosile,

nighapfikitsa ghamatendo ghose ghautendile,

na nolola tsisang'ano tsa ghamoko ghako tsautendile.

6 Hanikulomba nogholosa ghamoko ghangu,

nina ng'ilu ka isi ilihela ghamatsi.

7 Ghwe IMNDEWA, usumke unyidike,

kwaapfila nikeng'eneka ghendo!

Uleke kukala kutali na nene,

hela nitseghala na awala iwotsikighwa kuna likabuli.

8 Nemitondo nihulikitse uluso wako ing'aumala,

kwaapfila nene nehuwila ghweghwe,

unilanguse inzila yanitsobita,

kwaapfila nene nokulongela aghala ghanibama.

9 Ghwe IMNDEWA,

unikombole kulawa kwa maaduwi tsangu,

kwaapfila nene nipfisa kuna ghweghwe.

10 Unilangulitse nitende aghala ghaubama,

kwaapfila ghweghwe kwa Imulungu wangu,

na Iloho yako inoghile inilongotse mna inzila igholoke.

11 Ghwe IMNDEWA kwaajili ya litaghwa lyako unikombole,

kwa ihaki yako unilapfe mna ghamaghayo.

12 Kwaapfila konikunda,

uwakome maaduwi tsangu wose,

uwanange wose iwonidununza,

kwaapfila nene na mtumighwa wako.