1 Si twetwe baye, Ghwe IMNDEWA, si twetwe baye,

lekeni litaghwa lyako liliyeka litunyighwe,

kwa ajili ya uluso wa lilaghano lyako na ukutogholeka kwako.

2 Heule iwanu wa isi tsingi watse walonge,

"Imulungu wawo yali kwani?"

3 Imulungu wetu twetwe kakulanga,

yeye kotenda chochose chayobama ukutenda.

4 Lekeni milungu yawo pfipfo ipfinyagho pfa fetsa na nzahabu,

ifinighwe kwa ghamoko gha iwanu.

5 Pfina milomo, lekeni ng'apfilonga baye,

pfina nenge, lekeni ng'apfikona baye,

6 pfina maghutwi, lekeni ng'apfihulika baye,

pfina mula lekeni ng'apfinusa baye,

7 pfina ghamoko lekeni ng'apfibamasa baye,

pfina maghulu, lekeni ng'apfighenda baye,

wana mimelo lekeni ng'aikoloma baye.

8 Wose iwofina ipfinyagho apfo watseghala napfo,

pfipfila awala wose iwopfilolela watsakuwa ka ipfinyagho apfo.

9 Mwemwe muwanu wa Isiraeli mloleleni IMNDEWA,

yeye yuyo iyatsowapfila na kuwakinga.

10 Mwemwe muwanu wa ing'anda ya Haruni, mloleleni IMNDEWA,

yeye yuyo iyatsowapfila na kuwakinga.

11 Mwemwe imumpfuka IMNDEWA, mloleleni IMNDEWA,

yeye yuyo iyatsowapfila na iyatsowakinga.

12 IMNDEWA katukumbuka naye katsotubaliki,

yeye katsowabaliki iwanu wa ing'anda ya Isiraeli,

pfipfila katsowabaliki iwanu wa ing'anda ya Haruni.

13 IMNDEWA katsowabaliki iwanu wose iwompfuka yeye,

katsowabaliki iwakulu na iwadodo.

14 IMNDEWA yawongetse muwe wengi,

muwe wengi mwemwe na iwatsukulu wenu.

15 Mbalikighwe na IMNDEWA,

yeye iyaumbile kulanga na isi.

16 Kulanga kwakwake yeye IMNDEWA,

lekeni isi kaweng'a iwanu.

17 Iwanu iwafile ng'awaodaha baye kumtunya IMNDEWA,

wala awala iwohuhulumka kughenda hanu ihenyamale,

18 Lekeni twetwe ituli wagima tutsomtunya IMNDEWA,

sambi na matsuwa ghose ing'aghohupa. IMNDEWA yatunyighwe!