1 IMNDEWA yakwidike mna litsuwa lya ukughanzika kwako,

litaghwa lya Imulungu wa Yakobo likwinule.

2 Yeye yatse yakwapfile kulawa kuna ing'anda yake iyelile,

na yakwing'e ingupfu kulawa kuchidunda cha Sayuni.

3 Yatsikumbuke tsinambiko tsako tsose,

na yatsitoghole tsinambiko tsako tsa ukulakatsighwa.

4 Yakwing'e chaghubama ghumoyo ghwako,

Na yaitimilitse imipango yako yose.

5 Natwe tutsakwimba tudeng'elele ukuhuma kwako,

na kwa litaghwa lya Imulungu wetu tutsodinitsa tsibendela tsetu.

IMNDEWA yakutendele aghala ghose ghaumlombile.

6 Lelo nomanya ka IMNDEWA komkombola mbakighwa mapfuta wake,

komwidika kulawa kulanga kwake ikwelile,

katsomkombola kwa ghamatendo makulu gha ghumoko ghwake ghwa kujilo.

7 Wamwe wehuwila imituka ya ing'ondo,

na wangi wehuwila wafalasi,

lekeni twetwe twehuwila litaghwa lya IMNDEWA, Imulungu wetu.

8 Wawo wohulumsighwa hasi na wakughwa,

lekeni twetwe tutsakwinuka na kwima ghoya.

9 Ghwe MNDEWA, mkombole mfalume,

mna litsuwa lyatukukema utwidike.