1 Nomlilila IMNDEWA kwa litsi likulu,

nomlomba IMNDEWA kwa litsi lyangu yambonele libatsi.

2 Nitsolonga apfila pfanidununzika hambele hako,

na ghamaghayo ghangu nitsoghaghala hambele hako.

3 Hanitenyuka ghumoyo ghweghwe kwabaho,

na komanya nzila tsangu,

mna tsinzila tsanibita, iwanu waniteghela imitegho.

4 Ning'alola ubali wa kujilo,

haduhu munu iyodaha ukunyapfila,

nahela hanu ha ukutsumila,

wala haduhu munu iyodaha ukuwalangitsa ugima wangu.

5 Ghwe IMNDEWA, nene nokulilila ghweghwe,

nolonga, "Ghweghwe kwa hanu hangu ha ukutsumila,

na kongaya chanibama mna isi yanikala."

6 Utegheletse ichililo changu,

kwaapfila nene nahela ngupfu,

unikombole na awala iwonidununza,

kwaapfila wawo wana ngupfu kubita nene.

7 Unilapfe kulawa mna ichifungo,

ili nene nililongele mighede litaghwa lyako,

baho iwanu wana ihaki watsonitsunguluka,

kwaapfila kunitendela uluso mkulu.