1 Kuna ghweghwe ghwe MNDEWA, nakwinula iloho yangu,

2 Ghwe Imulungu wangu, nene nehuwila ghweghwe,

ndeke kughelighwa chinyala,

aduwi tsangu waleke kunihuma.

3 Awala wose iwokubeta ghweghwe ng'awatsoghelighwa chinyala baye,

lekeni watsoghelighwa chinyala awala wose iwowania kutenda ighehile.

4 Ghwe MNDEWA, unilanguse tsinzila tsako,

unilangulitse tsinzila tsaubama nene nibite.

5 Nilongotse mna ukulongesa na unilangulitse,

ghweghwe kwa Imulungu imkombotsi wangu,

nikubeta ghweghwe imisi yose.

6 Ukumbuke libatsi lyako,

na uluso wako, ghwe IMNDEWA,

kwaapfila apfo pfabaho kulawa ghumwande.

7 Uleke kukumbuka tsinzambi tsanitendile haning'ali na msongolo,

wala ghamatotso ghangu,

ila unikumbuke kwaapfila ghweghwe kwa mluso,

na kwaapfila ghweghwe IMNDEWA kunogha.

8 IMNDEWA kanogha na kagholoka,

apfo kowalangulitsa wana tsinzambi inzila yake.

9 Kowalongotsa iwanu wahole watende ighali ghahaki,

na kowafunda iwanu iwahole inzila yake.

10 Tsinzila tsose tsa IMNDEWA tsa uluso na tsotogholeka,

kwa awala wose iwolikinda lilaghano lyake na ghamalaghitso ghake.

11 Kwa ajili ya litaghwa lyako, ghwe MNDEWA,

unileghusile litotso lyangu mana kulu.

12 Angu nani iyompfuka IMNDEWA?

Ayo katsomlangulitsa mna inzila iyatsoisaghula.

13 Imunu ayo katsobweba ghendo,

na iwanaghe watsakwing'ighwa isi iwe yawo.

14 IMNDEWA kowalongotsa na awala iwompfuka yeye,

naye kowatenda walimanye lilaghano lyake.

15 Tsinenge tsangu tsomlolela IMNDEWA matsuwa ghose,

naye katsoilapfa imighulu yangu kulawa mna ilwapfu.

16 Unihundukile undole, na umbonele libatsi,

kwaapfila nene na mchuwa na noghanzika.

17 Ghamaghayo gha ghumoyo ghwangu ghongetseka,

lelo undapfe kulawa mna ukughanzika kwangu.

18 Lola apfila pfanighaya na pfanighanzika,

kuya unileghusile tsinzambi tsangu tsose.

19 Ulole aduwi tsangu pfawali wengi,

na apfila pfawonyihila mno.

20 Uukinge ugima wangu, na unikombole,

uleke kunileka nighelighwe chinyala,

kwaapfila nene nokutsumila ghweghwe.

21 Ighanoghile na ighali ghahaki ghanyike mgima,

kwaapfila nene nehuwila ghweghwe.

22 Ghwe Imulungu, wakombole iwanu wako Waisiraeli,

kulawa mna ghamaghayo ghawo ghose.