1 Ghwe MNDEWA, nokukema ghweghwe, yauli libambalawe lyangu,

uleke kuwa chitsiwi kuna nene,

kwaapfila ung'enyamala ghendo

nene nitseghala na awala iwoghenda kuna likaburi.

2 Hulika ichililo changu na umbonele libatsi,

ahala hanikukema unyapfile,

na hanikwinulila ghamoko ghangu hanu hako helile ng'ani.

3 Uleke kunibuluta hamwe na iwanu iwehile,

na hamwe na awala iwotenda ghehile,

iwolonga ighanoghile na wayawo,

lekeni mna imimoyo yawo mna ung'enye.

4 Uwalihe kwa kulola aghala ghawatendile,

na kwa kulola ighehile ghawo,

uwalihe kwa kulola tsisang'ano tsa ghamoko ghawo pfatsili,

Ona, uwalihe achila chawobamighwa walihighwe.

5 Kwa apfila wawo wotsitendela utalatsi tsing'onde tsa IMNDEWA,

atsila tsayatendile kwa ghamoko ghake,

apfo yeye katsowabondabonda na ng'atsowenula keli baye.

6 Lelo yatunitsighwe IMNDEWA,

kwa apfila kahulika ichililo cha ukulomba kwangu.

7 IMNDEWA yuyo iyali tsingupfu tsangu, na ingao yangu,

ghumoyo ghwangu ghwehuwila yeye,

na nene nyapfilighwa,

ghumoyo ghwangu ghudeng'elela,

na nene nitsomwimbila wila wa mighede.

8 IMNDEWA yuyo yali tsingupfu tsa iwanu wake,

na imbakighwa mapfuta wake yuyo iyomtsumila yamkombole.

9 Uwakombole iwanu wako, na ubaliki ulisi wako,

na uwadime, na uwakindise matsuwa ghose.