1 Nene tsanilonga, "Nitsakwalangitsa mna chila chanitenda,

na nitsolughoma ilulimi lwangu luleke kutenda nzambi,

ghumlomo ghwangu nitsoghoha chibang'wa hanikala na iwanu wehile."

2 Silongile chinu chochose baye, ninyamala tulu ghendo,

sonile ng'apfu baye,

na usungu wangu wongetseka,

3 mbaka ghumoyo ghwangu ghwaka ghumoto.

Apfila pfaning'ali nikwalangula pfipfo ghumoto pfaghwakile mmoyo,

kuya nonga aghano kwa ilulimi lwangu,

4 "Ghwe MNDEWA, unongele ugima wangu utsotsigha tsuwachi,

kuna matsuwa mangapi ighakalile,

unongele nimanye ghamatsuwa ghangu gha ukukala mgima pfaghosumka kumala."

5 Kughatenda ghamatsuwa ghangu gha ukukala mgima ghawe chidogho,

ugima wangu si chinu baye hambele hako,

ona, chila munu iyali muisi kawakuhupa ghendo.

6 Imunu koghenda ako na ako ka chimbeho,

pfose pfayosang'ana, kosang'ana hela.

kelundikila tsimali, akuno ng'omanya baye nani iyatsobweda kwa tsimali atso.

7 Ghwe IMNDEWA, lelo chanibeta chon?

Nene nehuwila ghweghwe.

8 Unikombole kulawa mna ghamatotso ghangu ghose,

uleke kuwaleka iwanu wabotsi waniseke.

9 Ninyamala tulu ghendo, sasame baye lilomo lyangu nonge mbuli,

kwa apfila ghweghwe yuyo yughatendile aghano.

10 Ulapfe ghendo utamu mkulu waungayile,

nene nimalitsika ghendo kwa ukutowighwa na ghumoko ghwako.

11 Ghweghwe komkembela na kumuadabisha imunu kwa ajili ya tsinzambi tsake,

naghwe kulumbusa ipfinu pfake ipfimnoghele,

kulonga pfijighwa na bulughwa, chila munu ka muhe ghendo.

12 Ghwe MNDEWA, hulika chanikulomba,

hulika chililo changu unyapfile,

uleke kuwa chitsiwi hanilila,

kwapfila nene na mgheni wako,

mbita nzila kama pfawakalile sekulu tsangu wose.

13 Lelo undeke nisangalamke ichihanga,

sambi apfino ng'ana mbukile lumwe baye.