1 Kuna twetwe Imulungu yuyo yatumtsumila na iyotwing'a ngupfu,

yeye kotwapfila ng'ani mna ghamatsuwa gha ukughaya.

2 Apfo lelo ng'atutsopfuka baye,

hata isi ing'aghalambuka,

na hata ipfidunda pfing'adedema haghatighati ha ibahali,

3 hata ibahali ing'atibuka na kuduma,

hata ipfidunda pfing'adedema kwa ukutibuka ako kwa ibahali.

4 Hana mto, ipfikolongo pfake pfoghutenda ghumji ghwa Imulungu ghudeng'elele,

ghumji agho ghwa hanu helile hayokala yeye Iyali Kuchanya Ng'ani.

5 Imulungu kamghati mwa ghumji agho, nagho ng'aghutsohighisika baye,

Imulungu katsoghwapfila chila haukucha.

6 Yeye hayadumile, isi ilumbuka,

na tsiisi tsa iwanu tsipfuka ghendo, na tsifalume tsighwa.

7 IMNDEWA yana tsingupfu kahamwe na twetwe,

Imulungu wa Yakobu yuyo yatumtsumila.

8 Mtse mlole tsisang'ano tsa IMNDEWA,

pfayatendile isi ikale uchuwa.

9 Yeye komalitsa tsing'ondo tsili mna isi yose,

kobena tsiminde, na imigoha koibena pfihande pfili,

imituka ya chuma koilakatsa na ghumoto.

10 Mwinyamale tulu,

na mmanye ghendo ka nene na Imulungu,

nitsakwinulighwa kuna iwanu iwali mna tsiisi,

nitsakwinulighwa mna isi yose.

11 IMNDEWA yana ingupfu kahamwe na twetwe,

Imulungu wa Yakobu yuyo yatumtsumila.