1 Umbonele libatsi, Ghwe Imulungu,

umbonele libatsi kwaapfila nene nokutsumila ghweghwe;

kuna ichimbeho cha ghamabawa ghako nene notsumila niwe mgima,

mbaka ghamaghayo aghano ghamale.

2 Nomkema Imulungu Iyali Kuchanya Ng'ani,

Imulungu iyonitendela ghose ghanibama.

3 Yeye katsonyapfila kulawa kuko kulanga na katsonikombola,

katsomkembela ayula iyoniwinzilitsa yangoghe.

Imulungu katsonilangusa apfila pfayali mluso na pfayotogholeka.

4 Nene na haghatighati ha wasimba,

niwasa haghatighati ha iwanyama wana inzala ng'ulu,

iwanu wana ghamatsino ka migoha na mishale,

na milimi yawo ka mapanga ighotemesa.

5 Winulighwe Ghwe Imulungu, kuchanya kulanga ghendo,

na utunitso wako wenele mna isi yose.

6 Wategha ghumtegho wayonze imighulu yangu,

na nene ninamila hasi kwa ukughanzika,

wanihimbila lipondo mna inzila yangu,

lekeni waghwila amwo wawo iwenyegho.

7 Ghumoyo ghwangu ghusindamala, Ghwe Imulungu,

ghumoyo ghwangu ghusindamala.

nitsakwimba, na kukudeng'elela ghweghwe.

8 Lamka, ghwe ghumoyo ghwangu!

Lamka ghwe chinubi na zeze,

nitsolamka lupfilipfili.

9 Ghwe MNDEWA, nitsolonga mighede kuna iwanu wa isi tsingi,

nitsokwimbila ghwehwe kuna iwanu wa isi tsingi.

10 Kwaapfila uluso wako mkulu upfika mbaka kulanga,

na ukutogholeka kwako kopfika mbaka kuna ghamabingu.

11 Winulighwe Ghwe Imulungu, kuchanya kulanga ghendo,

na utunitso wako wenele mna isi yose.