1 Imulungu komanyika mna isi ya Yuda,

na litaghwa lyake kulu mna isi ya Isiraeli.

2 Lihema lyake lya ako Salemu,

na kokala ako Sayuni.

3 Ako kuko kwayabenile imishale imeleseka,

tsingawo, imimaghe na tsisilaha tsa ing'ondo.

4 Ghweghwe Imulungu, kometameta

komeletseka kubita ipfidunda ipfimemile wanyama wa kubagho,

5 Maasikali wana ingupfu wawasa aku wabokighwa ipfinu pfawo,

wawasa fofofo ghendo,

kuduhu hata yumwe iyenule keli ghumoko ghwake.

6 Ghwe Imulungu wa Yakobu, haukembele

iwafalasi na iwadina falasi wose wawasa nongo ndito.

7 Ghweghwe yuliyeka yupfukighwa.

angu nani iyodaha ukwima hambele hako haughudubuka?

8 Kutangatsa kulawa kulanga apfila pfautsowahigha iwanu,

na isi yose ipfuka, inyamala tulu ghendo,

9 ahala hawinuke uhighe,

na kuwakombola iwanu wose iwonelighwe iwali musi.

10 Ukughudubukila kwako, kotsokutunya

awala walekighwe wagima ghweghwe haughudubuka watsokutendela tsisona.

11 Mwike tsinatsili na mtsilapfe kwa IMNDEWA, Imulungu wenu.

iwanu wose iwali mna tsiisi tsa habehi wamghalile tsinzawadi,

kwaapfila yeye yuyo wa ukupfukighwa.

12 Yeye kotsihulumsa tsiloho tsa iwatawala,

na wakupfukighwa na wafalume wose wali muisi.