1 IMNDEWA yatunyighwe.

Kabweda imunu ayula iyompfuka IMNDEWA,

ayula iyoghadeng'elela ng'ani ghamalaghitso ghake.

2 Iwanaghe watsakuwa na ngupfu muisi,

ilweleko lwose lwa iwanu iwompfa Imulungu lutsobweda.

3 Mkaye mwa imunu iyali apfo mtsakuwa na utajiri na mali nyingi,

na ihaki yake itsokala matsuwa ghose ing'aghohupa.

4 Ghumwanga ghowalangatsila mchisi awala wana imimoyo inoghile,

iwaluso, wana libatsi, na wana ihaki.

5 Katsobweda imunu ayula iyowatsima iwanu kwa uluso,

iyotenda ipfinu pfake kwa ihaki,

6 kwaapfila ng'atsohighisika ghendo baye.

Imunu yana ihaki katsokumbukighwa matsuwa ghose.

7 Ng'atsopfuka baye hayohulika mbuli tsihile,

ghumoyo ghwake ghugangamala,

na ghomlolela IMNDEWA.

8 Kagangamala ghendo mmoyo, wala ng'atsopfuka chinu baye,

mbaka yawone maaduwi tsake wotowighwa.

9 Yeye kowagholela ipfinu iwanu iwahingwa kwa uluso,

ihaki yake yokala matsuwa ghose,

naye katsotunyighwa ng'ani.

10 Imunu yehile katsoghona agho na katsoghudubuka,

katsoghegheda ghamatsino ghake na kuhupa.

ukulolela kwa iwanu wehile kutsakwagha ghendo.