1 Litsi lyangu lyomlilila Imulungu, yanyapfile

ona, nomlilila Imulungu yanihulike,

naye katsonihulikitsa.

2 Haning'ali nighanzika nene nimbama IMNDEWA,

nigholosa ghumoko ghwangu nechilo bila kwipfa,

lekeni tsandema ukukanzighwa.

3 Hanimkumbuka Imulungu, nene noghutilila,

na hanilonganika, iloho yangu yotsilika.

4 Ghweghwe kunitenda nitsodole tsinenge tsangu,

nighanzika ghendo mbaka sidahile kulonga chinu baye.

5 Nipfikitsa ghamatsuwa ighabitile,

imiyaka ibitile ya ghumwande.

6 Nechilo nikumbuka wila wangu,

ghumoyo ghwangu ghutongelela, na iloho yangu ighutsa,

7 "Pfihi IMNDEWA kotsowalema iwanu wake matsuwa ghose?

Angu ng'atsowatendela keli baye uluso wake?

8 Pfihi uluso wake umala kwa matsuwa ghose?

Angu ghayalongile nagho ghahupa mna ipfeleko pfose?

9 Pfihi Imulungu kesemwa ukuwa na libatsi?

Pfihi kaghudubuka mbaka kalema kutwonela libatsi?"

10 Kuya nene nilonga, "Achino chicho ichinitama mmoyo mwangu,

Nighukumbuka ghumoko ghwa kujilo ghwa yeye Iyali Kuchanya Ng'ani."

11 Nitsoghakumbuka ghamatendo makulu gha IMNDEWA,

ona, nitsoghakumbuka aghala gha ukukangawatsa ghautendile ghumwande.

12 Nitsopfikitsa tsisang'ano tsako tsose,

pfipfila nitsopfikitsa aghala makulu ghautendile.

13 Ghwe Imulungu, tsinzila tsako tsose tsela,

angu mulungu yuhi iyali mkulu ka Imulungu wetu?

14 Ghwegwe kwa Imulungu iyotenda ighokangawatsa,

ghweghwe kuwalangusa iwanu iwali mna tsiisi apfila pfauli na tsingupfu.

15 Kwa ghumoko ghwako ghuna ingupfu kuwakombola iwanu wako,

awala iwatsukulu wa Yakobo na Yosefu.

16 Ghamatsi tsaghakwona, Ghwe Imulungu,

Ghamatsi tsaghakwona ghweghwe, tsaghapfuka ghendo

mbaka ghamatsi ighaghendese hasi, nagho tsaghadedema.

17 Ghamabingu ghamwagha ghamatsi,

na Imulungu kaduma kulanga, na ilumwesa,

na imishale yako yasighwa chila hanu.

18 Litsi lya ukuduma kwako lilawa mna ichipfulapfumbi,

ghumwanga ghwa ilumwesa ghupulika mna isi,

nayo isi idedema na ihighisika.

19 Inzila yako ibita mna ibahali,

na tsakubita mna ghamatsi ighaghendese,

hata kama ghamatsayo ghako haubitile ng'aghoneke baye.

20 Kuwalongotsa iwanu wako kulonga kingili lya imifugho,

aku pfilongotsi wao tsa Musa na Haruni.